Sabalenka laka phuba lakna hlenchhuaktu Rybakina
Kum thum liamta 2023 Melbourne Park final-ah Aryna Sabalenka ngam loin Elena Rybakina a tlawm a, karliamta mai Inrinni zan khan Australian Open women’s singles final rematch-ah anni pahnih bawk hi intum lehin, tuntum chu Kazakhstan player Rybakina kum a herchhuak ve ta a, 6‑4, 4‑6, 6-4 hnehna nen a career-a a tum hnihna atan major trophy a hlawhchhuak.
2022 Wimbledon champion Rybakina hian world number one lakah set hnihna hloh bawk mah se set dang pahnihah a chungnun zawkna a lantir a, kum 2008 hnu lama set hloh miah lo chunga Grand Slam final thleng ve ve intum leh hmasakberah rinkai zawk top seed Sabalenka chu Rod Laver Arena chung khuh hnuaiah a duap zawk tlat!
Kazakh fifth seed kha ball hlap na taka sawi a ni ve reng reng a, tuntum final-ah pawh he hmuna vawi hnih champion tawh Sabalenka tan a tumpui nu kut atanga ball chhuak hmachhawn kha a hautak a, 2025 WTA Finals lallukhum inchuha a tlawm zawka a tang ang bawkin kum 26 mi lakah tum hnih a lo hawn ve tawh Daphne Akhurst Memorial Cup a chang zo ta lo a ni.
Hnehna a chan zawha an kawmnaah Rybakina chuan tunhnai kum engemawti chhunga Sabalenka hlawhtlinna lawmpui zet chungin an hma lamah final tam zawk an khelh dun chhunzawm zel a beisei thu a sawi a, amah tantu fans lam a hawi zui a, lawmthu sawiin, an ram Kazakhstan mipui laka a lawmzia a tarlang tel.
Rybakina zinkawng hi chhui zawi zawi lawk dawn ila.
He Moscow hmeichhe naupang ni thin hi tunah chuan Kazakhstan khua leh tui a ni tawh a; Melbourne Park-a a Grand Slam title pahnihna a sualchhuah lai thleng khan WTA ranking-ah number 5 ni mekin, Australian Open-ah hian number 5 seed ni chunga inlan a ni.
A Grand Slam title hmasa zawk chu kum 2022-a All England Club-a a lak niin, Australia leilungah a major title pahnih a hmin a, engtianga arh chho zel tur nge a nih kan thlir zel ang.
Kum ruk mi lek a nih lai atangin a nu leh pain tennis nen an inzawmtir a; kum 2014 khan ITF Circuit-a a professional career tanin, a pianna Russia ramah chuan a kalkawng zel atana chhawmdawlna a duh ang a hmuh theih loh avangin kum 2018 khan Kazakhstan khua leh tui ni turin a inziaklut ta zawk a ni.
Kum 2017-ah ITF Circuit-ah a title hmasa hlawhchhuakin, he mi kum hian doubles title pahnih a la phawt a; a kumlehah chuan singles leh doubles title pakhat ve ve a hmin zui leh.
Kum 2019-ah phei chuan WTA title a hlawhchhuak ve ta hial a, Bucharest khaw final-ah Patricia Maria Tig hnehin, ranking lamah pawh top 50 a kai chho ta.
Covid-19 hripui avanga thla nga chuang WTA Tour khar a nih hma chiah kum 2020 khan tournament panga a hmachhawnah tum li ngawt final a lut hman a; Hobart khawpuiah hnehna changin, a WTA title pahnih a sualchhuak nghe nghe.
WTA ranking thar a chhuak a, Kazakhstan player zinga top 20 kai hmasaber a ni zui ta hial a ni.
Kum 2021 a her chhuak a, French Open-ah quarter-final a thleng a, kha mi kum khan world number 14 ni chungin kum a khar pha tawh.
Kum a thar a, hmasawn zawng zela kalin a vawi khatna atan Wimbledon final hial a lut mai ni loin a tumpui Ons Jabeur laka hnehna nen a Grand Slam title hmasaber a hlawhchhuak ta a ni.
Tarlan tawh thin angin, kum 2023 khan Melbourne Park-ah tho hian a Grand Slam final vawi hnihna khel mah se set thum inbeihnaah Aryna Sabalenka ngei mai hi a ngam lo a, tournament zawhah a tum khatna atan top-10 ranking a luah zui ta tho a ni.
Kum 2024 khan final vawi nga a luhah vawi thum a champion a, chu’ngte chu – Brisbane, Abu Dhabi leh Stuttgart niin, Doha leh Miami lamah runner-up a ni thung.
Nikum khan title pathum bawk hawn lehin, chu’ngte chu Riyadh trophy bakah Strasbourg leh Ningbo lallukhumte niin, hmeichhe tennis kum kharna WTA finals title inchuhna final-ah world number one Sabalenka hi a lo hneh ngat tawh a ni.
Kum 2023 Melbourne final-ah Sabalenka ngam lo mah se Rybakina tan tuntum final-ah khan Belarusian hlaua kimki ngawtna tur chhan a awm lo reng a ni!
Sabalenka laka phuba lakna hlenchhuaktu Rybakina
