Sabrina Carpernter “Manchild” a Hot ber

Sabrina Carpernter “Manchild” a Hot ber
Sabrina Carpenter hla thar ‘Manchild’ chu Billboard Hot 100 (singles) chart No.1-ah a debut a, he chart-a a hla No.1 kai thei pahnihna a ni a, he chart-a a hla No.1 a debut thei pakhatna a ni bawk. Chart No.1-a debut tih chuan chart ranking-a a lanna hmasa bera No.1 kai nghal tihna a ni.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio & official video), radio airplay leh sales data te chu tehna pawimawh a ni.
‘Manchild’ hian kar khat chhungin US-ah stream maktaduai 27.1 leh sales 20,000 a nei thei a, radio airplay pawh ngaithlatu maktaduai 14 a nei thei bawk.
Sabrina Carpenter chuan a hla thar ‘Manchild’ Hot100 chart-a a No.1 chu a lawmzia post-in, “He thil hi ka tana a hlut dan hi ka sawifiah thiam lo! He hla hian min tihlim tak zet a ni. In lo ngaihthlak thin avangin ka lawm e,” a ti a, he hlaa a thawhpui, producer Jack Antonoff leh songwriter Amy Allen te tag-in, “Ka hmangaih che u,” a ti bawk.
‘Manchild’ hi Sabrina Carpenter album thar tur ‘Man’s Best Friend’ atanga a lead single a ni a, a hla Hot 100 chart No.1 a debut thei hmasa ber niin, a hla he chart-a No.1 kai thei pahnihna a ni bawk. A hla dang ‘Please Please Please’ chu ni kum khan No.1 a lo kai tawh bawk a, mahse, he hla hi No.1-a debut a ni lo.
A album thar ‘Man’s Best Friend’ hi August thlaah a tlangzarh dawn a, a lar chhuahna album “Short n’ Sweet” a tlangzarh atanga kum khatna vel chiah a ni ang.
Sabrina Carpenter hian Billboard Hot 100 chart top 10-a lang thei hla pali a nei tling ta a, ‘Manchild’ leh ‘Please Please Please’ bakah a hla dang ‘Espresso’ (No.3) leh ‘Taste’ (No.2) te chu top 10-ah a lanpui taw bawk.
Alex Warren hla hit, he chart-a kar hnih No.1 ni thei ‘Ordinary’ chu No.1 atangin No.2-ah a tawlh a, chart No.1 hlui tho Morgan Wallen ‘What I Want’ featuring Tate McRae chu No.2 atangin No.3-ah a tawlh, Wallen hla dang “Just in Case” chu No.3 atangin No.4-ah a tawlh a, a hla dang “I’m the Problem” chu No.5 atangin No.6-ah a tawlh ta bawk.
Chart a kar 13 No.1 ni thei Kendrick Lamar & SZA ‘Luther’ chu No.4 atangin No.5-ah a tawlh a, kar 19 No.1 ni thei Shaboozey ‘A Bar Song (Tipsy)’ chu No.6 atangin No.7-ah a tawlh a, kar nga No.1 ni thei Lady Gaga leh Bruno Mars ‘Die With a Smile’ chu No.7 atangin No.8-ah a tawlh ta bawk.
Chart No.1 hlui bawk Teddy Swims ‘Lose Control’ chu No.8 atangin No.9-ah a tawlh a, he hla hi Hot 100 chart top 10-ah kar 65 a lang tling ta a, he chart top 10-a lang rei thei ber record a siam chu a sawhnghet leh ta sauh a, top 10 pawn lama a lan nena he chart-a a lan rei zawng chu kar 95 a tlingin, he chart-a lang rei thei ber a ni bawk.
Billboard Hot 100 chart top 10 khartu chu chart No.2 pawh lo ni tawh Benson Boone ‘Beautiful Things’ niin, No.9 atangin No.10-ah a tawlh ta a ni.