Daily Newspaper

Sachin Pilot leh Congress hruaitu lawkte inrem ta

15

Sachin Pilot chuan Rahul Gandhi leh Priyanka Gandhi Vadra te nena inhmuhna an neih hnuah a helna titawpin nimin khan Rajasthan a pan zui a. Chief Minister Ashok Gehlot nena an intihbuai hnu thlakhatah inremna an siam thei chauh a ni.
Sachin Pilot-a’n lungawilohna a neih te chu Gandhi te chuan enfel an tiam a, chung zingah chuan Ashok Gehlot a chetdan te pawh a tel a ni.

He mi hnu hian Congress te chuan Priyanka Gandhi telna panel mi pathum awmna siam chuk chukin rebel MLA 19 te nena inhmuhna siam zui nghal a ni bawk.

Hetihlai hian Chief Minister Gehlot erawh Sachin Pilot leh Congress party hruaitu lawk tena inremna an siam chuan mak a tihtir hle nia sawi a ni thung a.

Chief Minister Gehlot chuan Jailsalmer, Congress MLA rualte a dahkhawmna a panzui nghal a ni. MLA dah khawm te chu an lawm lovin an lungawilo hle nia sawi a ni bawk.

Pathianni zan khan MLA rual te chuan rebel MLA te chu phatsantu an nih avangin hrem tur tia sawiin Congress-a an let leh phal loh tur, an lo ti tawh a ni.

Gehlot chuan a minister pathumte nen hotel Suryagarh-ah meeting an nei zui dawna sawi a ni a, he hotel hi MLA rual te Jailsalmer a dahkhawm an nih hmaa July thla atanga an awm khawmna a ni.

Chief Minister Gehlot chuan a laka rinawm te hnemin chet a la zui nghal nia sawi a ni bawk a. Gehlot chu Congress thuneitu sang ten inremna awm theih nana chetla turin an ti zui a ni. Hei hian Gandhis tena Pilot an ngainatna a lantir anga ngaih niin Madhya Pradesh ah Jyotiraditya Scindia chhuah avanga Congress sorkar tluchhia ang kha thlentir an duh tawh lo nia sawi a ni bawk.

Sachin Pilot chuan Gehlot-a’n a banna post pahnih Deputy Chief Minister leh Rajasthan Congress chief nihna a chelh leh ang em tih erawh a chiang lo thung a.

Sachin Pilot chuan Gandhis te nena inbiakna an neihah a thil phut lian ber Chief Minister atanga Gehlot paihthlak pawh a hnuklet ta bawk nia sawi a ni bawk.

Thawhtanni zan khan reporter-te hnenah a lungawilohna chu ‘ideological issue’ thil a nih thu a sawi a. “Thil thenkhat sawi chian duh ka nei a, ka sawi chiang reng bawk a ni. Chungte chu a tir atanga ka sawi sa a ni a principle behchhan a ni. Chung thil te chu party that nana sawichhuah ngaia ka ngaih a ni,” tiin a sawi bawk.

Sachin Pilot chuan Gandhis leh senior leader tena a lungawilohna an ngaihthlak avanga lawmawm a tih thu sawiin India tha zawk leh Rajasthan mipuite tan leh democratic value humhim tura thawh zel a tum thu a sawi bawk.

Sachin Pilot chuan, “Kan chhungkua-in value kalpui kan nei a. Tu pawh dodal eng ang mah ila tawngkam mawi lo kan hmang ngai lo,” tiin a sawi a.

“Ashok Gehlotji hi kei aia upa a ni a, ka zah a, mahse, hnathawh kaihhnawihah chuan zawhna siam thei ka ni,” tiin a sawi bawk.

Kan lo lawm ang
Rajasthan Chief Minister Ashok Gehlot chuan a hmain Sachin Pilot chu ‘hmantlakloh’ tiin a lo sawisel tawh a.
Mahse, tuna inremna a awm leh takah chuan ‘Party-in MLA te ngaihdam tur a ti a nih chuan lawm takin kan lo lawm leh mai ang’ tiin a sawi.

“MLA tu pawh ka laka lungawi lo an awm chuan ka chinfel tur a ni a. Chu chu tun hma atanga ka tih thin niin tunah pawh ka ti leh bawk ang,” tiin Ashok Gehlot chuan a sawi a.

Jaisalmer a MLA rual dahkhawmna a pan hmaa thuthar thehdarhtuten an biaknaah Gehlot chuan, “Heng MLA te hi ka laka rinawm an ni a. BJP-in theihtawp chhuaha bum a tum chungin min thendarh thei lo. Pawisa, nihna pek an tiam a, mahse, min chhuahsan chuang lo. MLA te hnenah ka damchhung chuan ka enkawl ang che u tiin ka hrilh a ni,” tiin a sawi a.

“BJP ten min tihthluk an tum a, mahse, a sawhkhawk an hrethiam lo a ni. Centre sorkar hian a rilru hlohin bawraw takin leh zahna pawh hre lovin politics bawlhhlawh thuneihna nasa zawk an chelh duh avangin an kalpui a. India history-ah tuna centre sorkar BJP ang em ema zakthei lo an la awm lo. Tunah chuan zirlai zirtir an hun ta,” tiin Rajasthan Chief Minister chuan a sawi bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy