Saif Ali Khan vit-tu an man
Bandra, Mumbai-a a chenna inah chemtea vih a nih atanga ni hnih chhungin Bollywood star Saif Ali Khan vittu ni a puh Mohammad Sharif Ul Islam Shehzad, kum 30, chu Mumbai Police ten Thane-ah an man a, police-te chuan Shehzad hi India-ah Bangaladesh atangin a ruka rawn lut niin an sawi.
Saif Ali Khan hi a hnungzang ruh (thoracic spine)-ah chemte a vih niin, Lilavati Hospital panpui nghal a ni a, hmanhmawh taka zai nghalin, cheme inches 2.5 a sei an zai chhuah sak nghal a, tunah chuan Saif hi a dinhmun ngaihtuahawm a ni tawh lo niin Times of India-in a tarlang.
Nimin khan Mumbai Police-te chuan thuchhuah siamin, Shehzad hi Jhalokati district, Bangladesh a cheng, India-a rawn lut ru niin, a hming dang ‘Vijay Das’ tih te pawh a lo hmang a, Mumbai-ah hian kum chanve vel hnathawkin a awm tawh a, housekeeping agency pakhatin an lo chhawr a ni.
Shehzad hian rukru tura in chhunga lut niin, mahse, a in luh rukna in chu Saif Ali Khan chenna in a ni tih a hre lâwk lo niin Times of India chuan a tarlang. Shehzad hi Saif te chenna ina a luh hnuah in-a hnathawk pakhat nen a inhnial buai laiin Saif hi a rawn inrawlh ve ta a, Shehzad hian chemtein a vit ta a, a vih hnua a tlanbo zui ta niin an tarlang.
Police ten ngawrh taka an ui zui hnuah darkar 70 chhungin Thane-ah an man ta a , Bharatiya Nyay Sanhita (BNS) section hrang hrang hnuaiah charge niin, chung zinga chuan mi inah lut ru leh India-a dan loa a luh ruk avangin Passport Act te pawh a tel a, he thu buatsaih lai hi chuan Khar Police Station-ah kawl mek a ni.
Saif Ali Khan vit-tu an man
