Saiip puan sina kan dilna
Pathian-in min chhang
– Lalthansanga
Sai ip puan sina an dilna chu Pathianin a chhang a, Mizoram-in kawng dik a zawh tan tih minister Lalthansanga chuan a sawi.
Thawhtannia ZPM office-a inkhawmah ZPM hruaitu Lalthansanga hian kum 40 dawn sawrkar lo kal tawh dan chu thawk leh khata thlak hlawk theih ni lo mah se, zawi zawiin an insiamrem chho zel tih a sawi. Inrenchem kawngah sawrkar a kal nasa a, sawrkar officer-in office-a TV an kawl theih dan leh kalphung thenkhat dang pawh siamthat zel niin, zawi zawiin kawng dik lam panin sawrkar a inher tih a sawi a ni.
Sawrkar hmasain 2023 April – August chhunga sum a puk chu cheng vaibelchhe 1936.4 a nih laiin, ZPM sawrkarah 2024 April – August chhunga sum puk zat chu cheng vbch 977.7 a ni tih sawiin, “ZPM sawrkarah chuan hunbi inang rengah kan lei bat zat hi cheng vaibelchhe sang chuangin sawrkar hmasa nen a inthlau a ni,” a ti.
Sawrkar tharah phailam mithiamte an phur hle a, mithiamten hmasawnna hna thawh kawnga kut rawn thlak an châk a. Silk pangngang tha leh sangha lama hma lakpui tumin an rawn kal awl lo niin minister hian a sawi. Chief Minister Rubber Mission kalpui tan niin, Govt. Zirtiri Residential Science College hmun hluiah Training Centre buatsaih a ni dawn tih a sawi bawk.
North Eastern Council atangin kuhva scope leh a ro siamna tur project min an pe dawn tih a sawi a. Country of origin certificate dik tak Mizoramin a pe tawh dawn tih a sawi. ZPM sawrkarah kuhva tawlhruk a kimki tih Lalthansanga hian a sawi.
“Tawngtaina nen sai ip puan sina kan dilnate Pathianin min chhang a, Mizoram hian kawng dik a zawh tan a ni,” a ti.
Saiip puan sina kan dilna Pathian-in min chhang – Lalthansanga
