Site icon The Aizawl Post

Sailova’n nupui a nei dawn ta

Thawhtanni kalta khan man an hlawn tawh a, vawiin chhun dar 12:30 hian Dawrpui Presbyterian Kohhran biak in-ah Vanlalsailova leh Cindy B Lalrinfeli te chu an inkutsuih dawn ta a, Sailova chuan a nupui neih lawmpui turin Mizo mipuite a sawm nia sawiin, “Inthlahrunghauh lova lokal turin ka sawm tak meuh che u a ni,” a ti. Hetihrual hian inneihna hmuna kal thei lo tan inneih inkhawm hi LPS leh Sailova YouTube channel-ah te live-a tihchhuah a ni ang.
Sailova chuan thil hlimawm leh lungti lengtu leh a tlangvalna thlahliam nan, a nupui neih ni, vawiin, January ni 25 hian khawvel puma a hla lo ngaithla a lo hlutsak tute, inneihnaa kal thei lo tur zawng zawng ten kawrsen emaw Tshirt sen emaw hain a nupui pualin “Aw Hmeltha” tih hla mahni remchanna hmunah chhun 12:30-ah lo play chuah chuah turin a sawm a. He hla hi an play ngei tih leh thawmhnaw sen an ha ngei tih lanna video cover chu a YouTube channel achhawp chhuah sak vek a tum bawk a ni.

Sailova nupui neihnaah hian Mizo zaithiam lar ten an tawiawm dawn a, gospel singer hmeichhe rualin wedding cake zai an buaipui ang a, anni hian mo lawm tura kal mipui te hnenah cake hi an sem nghal dawn a, mo lawmnaah Zoramchhani leh Zorema an duet bakah, One in Christ, Hlimhlimi leh Maruati duet, Israela Pachuau leh Joseph Zaihmingthanga te an zai dawn bawk a ni.

Exit mobile version