Daily Newspaper

Saints chak zel, Arsenal tantuten khua pawh an hawi ngam ta lo

10

London club lian Arsenal chu Premier League-ah an che chhe zui zel a. An hmelma lian tak Tottenham hneh lova an tlawm hnuin an mualah ngei table hnuai lama awm Burnley an hneh lo zui leh a, Gunners hi an talbuai tak thui takzet tawh. An mualah ngei team talbuai Burnley an hneh loh leh tak zel vang hian Arsenal tantuten khua pawh an hawi ngam lo a ni ber tawh a. Hmui tuamna (mask) chu mit tuam nan an hmang ta hial mai le.

Auba goal lawm chi loh
Season tir lamah beiseiawm taka bul tan ve zuk, Europa League lamah hneh theih loh, chak reng mai ni siin Arsenal chu Premier League-ah an talbuai tak zet tawh a. He thu buatsaih lai thleng hian khelh 12 atanga point 13 hmuin 15-na daihah an awm. Arsenal goal thun khawl Auba-meyang chuan lehlam goal-ah a tilut thei lo tluan zel laiin, an lamah a tilut khut a, chu goal chu an tlawmpui zui ta hial a ni.

Emirates stadium-a inkhelah hian Mikel Arteta team Arsenal in bul an tan tha lo viau. Chawlhlawk hmain goal lut a awm thei lo phawt. Second half tan atanga rei lo; minute 56-naah uchuak taka a thinrim na a tihlan vangin Arsenal midfielder Granit Xhaka hnawh-chhuah a ni. An khelh that loh sa bakah kim lo zawk an nih hnuin Gunners an buai leh zual. Minute 76-naah Captain Aubameyang chuan an lamah a ti-goal palh hlauh. He goal hi hun tawp thlengin an sut thei lo tluan a. An mualah ngei mualpho takin an tlawm phah ta a ni.

Mikel Arteta hnuaiah Arsenal chuan hun chhe tak an hmang mek a. Top flight huanga an chetchhiat ber record an nihrual chiah. Inelna sangah bul an tan chhiat ber tum chu kum 1959 khan a ni a. Hemi hnua an chetchhiat leh ber tum chu tun hi a ni leh ta chiah a ni. Arsenal in record chhe tak an neih laiin Burnley erawh chuan Arsenal laka an record chhe tak an thaichhe ve chiah thung. Kum 1974 hnu lamah inelna sanga an hmachhawn tumin an hneh thei ngai miah lova, game 15 chhung zet an hneh theih loh zawn chu a vawikhat nan an hneh ve ta nawlh a ni. Arsenal hian EPL 2020-21-ah vawi 12 khel tawh in, goal 10 chiah an la thun a, hei hi 1981-82 hnu lama goal an thun tlem ber tum a ni bawk a. A chhe lamah hnuhma thar an hnutchhiah chho kauh kauh a ni ber mai. Nilai zan khian season kal meka khel tha tak Southampton an mikhual dawn a, an mualah ngei an tlawm zui leh a nih chuan an manager Mikel Arteta an ban tawh ngeiin a rinawm.

Palinaah Saints
Nilai zana Arsenal hmachhawn tur Southampton chuan pathianni zan khan Sheffield United an mikhual a, si thum faia hnehna changin, palina an luah let leh. Saints tan hian Che Adams, Stuart Armstrong leh Nathan Redmond ten goal an thun a, an mualah nuamsa takin hnehna an chang. Season kal mekah rin phak bakin an khel tha chhunzawm zel a ni ber mai.

Pathianni zana inkhel dangah champion lai Liverpool leh Fulham chu 1-1 in an inhnehtawk a. Season kalmeka khel tha Leicester City chuan an mikhual Brighton chu si thum faiin an sawp ve bawk.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy