Sainunmawia kutah bronze

June ni 10-17, 2024 chhunga JSK-Chetan Anand Sports Centre, Ameenpur, Miyapur, Hyderabad-a khel zawh tak Yonex-Sunrise All India Sub-Junior Ranking Badminton Tournament 2024-ah Sainunmawia Sailo, Ramhlun Venglai, Sihphir Badminton Club tana khel chuan Under-17 Mixed Doubles category-ah bronze medal a dawng.
Sainunmawia Sailo hi Ishita Negi nen tangdunin U-17 Mixed Doubles-ah an inlan a, quarter-final match-ah Sachin A. leh Ananya A. thawkdun chu 21-16, 21-13 in an hneh.
Qualifying atanga bul tanin (qualifying-ah hian match thum an khel) semi-final an thleng a; last four-ah hian Manish S. Reddy leh Deepak Raj Aditi inkawp chu deciding game-ah 21-19, 19-21, 15-21-in an hneh lo a, uiawm takin tla mah se medal an hlawhchhuak ta tho a ni.
Under-17 Boy’s Doubles category-ah Malsawmhlua (Mama), Serchhip chu a partner nghetsa Mahendra Kalahasti nen tangdun lehin, quarter-final match-ah Gokul K. leh Vishank Surendar inkawp chu 21-18, 21-12-in an hneh a, semi-final khel tura an inbuatsaih lai mekin an tumpui turte’n Mama partner kum chungchangah complaint an thehlut a, adhaar card nena an thlunzawm a pa phone number an lo hmang chhunzawm tawh si lo a, verify mai theih a ni lo. Kum chungchang avangin uiawm takin an walk over a; an tumpui turte hi an lo hneh fo tawhte an nih avng leh an hmabak leh turah chak ve ve thei tura an indah laiin uiawm takin an tla ta a ni.
Hetiang chiah hian Zoramthari Renthlei, Champhai chuan a kawppui nen Under-15 Girl’s doubles-ah champion lai an vuak thlak hnuin, a partner chu kum chungchangah hek a ni a, adhaar card buaina avang bawkin an verify thei ta lo a, quarter-final match turah walk over bawkin an chak ta lo a ni.
Under-17 Boy’s Doubles category-ah Sainunmawia Sailo leh Vanlalpekhlua Sailo thawkdun chuan quarter-final an thleng bawk a; an tumpui seeded number 3 Bala Pranay Pragda leh Pranit Somani tangdun chu 21-18, 21-11-in an hneh ta lo thung.
Zoramthari Renthlei hi Under-15 Girl’s Singles category-ah khel bawkin round of 32 a in vaw thleng a; Vanlalhruaia Sailo chuan Under-15 Boy’s Doubles huangah round of 16 thlengin, Under-17 Boy’s Doubles category-ah qualifying atanga tanin round of 32 a thleng thei bawk.
He’ng Mizo naupangte hi TATA Trusts, NEIDA, MSSC leh MBA-te thawhhona atanga chherchhuah, Kotak Pullela Gopichand Badminton Academy (KPGBA), Hyderabad leh ITM University Badminton Academy, Raipur-a TATA Trusts (NEIDA) sponsor-a awm mekte an ni.
Mizoram Badminton Association chuan kan Mizo naupang, Mizoram hming tithatute a chhuang a, dinhmun sang zawk leh hlawhtlinna ropui zawk an chan zel theihna’na theihtawp chhuah zel turin duhsakna sang ber a hlan nghal bawk a ni.