Mizo Inchai Title Fight 2026 chu zanin dar 8:00 atangin PLS Arena, Falkland-ah tan a ni dawn ta. Kawnghren inchuh tanna zanah inchai hmuhnawm ber tur ngaih zing ami Pate kawnghren chuhin Saitual makpa B Lalawmpuia leh Saitual tlangval Jony Lallawmkima te an inhmachhawn dawn. Nulaihawi champion Elizabeth Rohlupuii’n Ruthi Lalhruaitluangi lakah a kawnghren humhim a tum dawn bawk.
Opte-a vs Jony
Pate champion nih nawn leh tum B Lalawmpuia hian kum 2022 khan kawnghren inchuhnaah Lalchhanhima (Pachhana) hnehin a lo champion tawh. 2024 khan a hneh tawh Pachhana lakah vanduaiin a kawnghren a hloh. Pachhana kalsan kawnghren lak let leh tumin Saitual tlanval Jony Lallawmkima a hmachhawn dawn.
Champion hlui Opte-a hi a pumrua en ngawt aia thahrui ngah em em mai a ni a, Wrestling thiamna ril tak a nei bawk. Pate champion a nih tawh bakah North East Games-ah Mizoram tan Gold Medal a lo la tawh bawk. A tawnhriat tha leh thiamna ril chhawr tangkaiin Jony-a hneh ngei a inring.
B Lalawmpuia hmaa ding tur Jony Lallawmkima hi pate pian tha, Mizo in ‘Chak pian’ kan tih ang kha a ni. Mizoram Wrestling Association (MWA) buatsaih Inter District Wrestling championship 2026-ah Gold Medal a la a, hemi tum hian mipa lamah Wrestler tha berah thlan a ni bawk. Hei bakah hian Mizoram tan Silver medal a lo la tawh bawk. A pian a tha a, a khingpui tur aiin a lianin a rit zawk bawk a, champion thar nih theihna hun tha a nei.
Jony-a chuan kawnghren chuha a khingpui tur Opte-a chu, “Saitual makpa a ni a, kei Saitual tlangval niin Saitual tlangval ngeiin champion kawnghren a hawn ang,” tiin champion ngei a inring hle.
Eli vs Ruthi
Nulaihawl champion lai Elizabeth Rohlupuii leh Ruthi Lalhruaitluangi te chu zan ina kawnghren inchuh hmasa tur an ni. Champion lai Eli hi Mizo zinga wrestler tha filawr zinga mi a ni a, Mizoram aiawhin medal 5 lai a lak tawh bakah Mizoramah medal 15 chuang zet la tawh a ni a, champion nawn thei tura ngaih a ni.
Eli khingpui tur Ruthi hi kum 17 mi chauh a ni a, 2026-a kawnghren inchuh tur zinga nuapang ber a ni. Kum 12 a nih lai atanga wrestling khel tanin hma a sawn chak hle a, Eli bawhbet turin a inring tawk hle. Eli leh Ruthi hian inchai hmuhnawm an lantir ngei beisei a ni.
Saitual makpa vs Saitual tlangval
