Hriamhrei tha eltiang pawh keng ila sakei nena inhmachhawn chu tuman kan chak lo ang, Sunil Dhotre ve chuan lungtum hmangin sakei a bei a, a damchhuak tlat. Sakei kaah lungtum a hnawh tlat a, sakeiin a seh theih bik loh avangin a kalsan ta a ni. Times of India-in a tarlan danin Bhopal, MP atanga km 300 vela hla, Chhindwara-ah chuan loneitu pakhat chu sakeiin a bei thut mai a, sakei nen hian an inchai viau mai a, a tawpah sakei beidawng chuan a kalsan ta a ni.
Sunil Dhotre chu a nupui Sarla nen, Boria khaw mi thenkhat nen Zirtawpni kalta khan pangpar lakhawm turin ramah an chhuak a, Sunil hi kawrte tui in turin a kal fal deuh a, mahse, rin loh takin a tui in tur chu sakeiin a bei ta thut mai a ni. Sakei hian a hmai leh kutah te a bei a, mahse, Sunil hian a theih tawpin a bei let a. Sakei chuan leiah a nawr bet a, a nghawng a seh a tum laiin Sunil chuan lungtum a dap fuh ta hlauh a, chu lungtum chu sakei kaah a hnawh lut ta ringawt mai a ni.
A lungtum ken chu thlah duh lovin sakei kaah chuan a thuk thei ang bera hnawh luh a tum ve tang tang a, sakei chuan a seh theih tak loh avangin, midang an thawm hriaa rawn tlan khawm ten thawm siama sakei chu an rawn hnaih ve tak bawk avangin sakei zawk chu a insaseng ta a ni.
Sunil hian a hmai leh banah te, a taksa hmun hrang hrangah hliam a tuar nual a, Chhindwara damdawi inah enkawl nghal a ni.
Sakei nen an insuala, sakei kaah lung hnawhin a dam chhuak!
