Sakhaw tih bik nei party kan
thawhpui thei lo – Lalsawta
Congress party chuan sakhaw zalenna a duh a, sakhaw tih bik nei party reng reng an thawhpui ve thei lo tih Congress president Lalsawta chuan a sawi.
Zirtawpnia Congress Bhawan-a political session-ah MPCC president chuan sakhaw tih bik neilote tangrual tura sawmin, “Kohhran, NGO leh political party hrang hrangte pawh kan hnam leh kan sakhua himna atana tangho turin ka sawm a. India ram zau zawk leh Manipur boruak kan ngaihtuah hian thut mai mai a theih tawh loh. Sakhaw zalenna a awm theihna’n kan tanrual a ngai a, Mizorama sawrkar mek MNF hian NDA huangchhungah BJP a thawhpui a, ZPM pawh BJP nen in thawk dun, ti ila an haw viau ang, mahse BJP an haw tak tak si lo,” a ti.
Inthlana sum chakna chu Congress party chuan ‘dah nil’ an tum tih Lalsawta hian a sawi. “Inthlana sum chakna thah chungchangah hian a duhthusam a sawi mai mai a ni, min ti maithei, mahse, ka duhthusam hi Mizoram tan a that avang leh kan ti thei tih ka hriat avanga sawi ka ni. Kan thenawm state-ah te chuan MLA-a ding turin cheng nuai 400/500 neih a ngai tawh. Chutiang ramah chuan Mizoram hi siam kan tum lo. Inthlana sum chakna hi tihtawp kan tum a nih chuan tun hi tih tawp hun a ni,” a ti. Suma lei theih anga min ngaitute chuan min hmusit tihna a ni tih sawiin, heng mite hi ti zak turin mipui a sawm tih a sawi.
Sakhaw tih bik nei party kan thawhpui thei lo – Lalsawta
