Mizoramah sawrkar tha siama sakhaw zalenna tungding leh turin Congress party kaihthawhin a awm leh mek tih Congress hruaitu hlun Lal Thanhawla chuan a sawi.
Ningania Serchhip-a District Congress Conference neih a hmanpuinaah Congress Working Committee member Lal Thanhawla chuan India ram leh kan ram dinhmun tur ngaihtuah thleng phak politics kan ngaihven a tul, tiin, “Kan sakhua a him loh chuan kan hnam a him loa, kan ram a him ngai loang. Congress sawrkarna hmunah Kristiante tunah zalen takin chanchintha an hril thei,” a ti.
India ramah sakhaw zalenna kan neih theih chhan chu Congress a ni tih a sawi a. Tunah BJP sawrkarna hnuaiah India ram hmun hrang hrangah Kristiante an chep hle nia sawiin, “Manipur-ah pawh Kristiante chungah harsatna nasa takin a thleng a. Heti khawpa Manipur-a buai a, Kristian biak in suasam a nih lai pawhin Prime minister Modi chuan engahmah a ngai lo. BJP sawrkar hnuaiah hian Kristiante leh sakhaw dang an him loa, hnam tenau zawk chimral tumna a lian hle,” a ti.
Congress party-in hruaitu a nei tha ber tih Lal Thanhawla hian a sawi. “President mithiam leh rintlak Pu Lalsawta kan nei a. Thachhangdawltu tha tak kan neih bawk avangin tun inthlanah chak ngei kan inbeisei. Mizoramah sawrkar tha siama sakhaw zalenna tungding leh turin Congress party kaihthawhin a awm mek a. Mipuiin eng party nge hmanruaa hman tur leh chawilen tur hriat a ngai,” a ti.
ZPM-in kalphung thar an sawi laiin, Val Upa Council-in tih loh atana an sawi apiang an ti leh vek si a, kalphung thar a la hmu lo tih Congress hruaitu hian a sawi. “Kalphung tharah chuan hamthatna dawn theih zawng zawng hmanhmawh taka dawn zung zung hi a ni ber. Kalphung thar chu tih loh tura sawi tih leh si hi a ni,” a ti.
MNF sawrkar tirha ram leh hnam tana a hnathawh hmasa ber chu ‘hming thlak’ a ni tih sawiin, MNF-in ar vulhna atan maia an chhuah, Congress sawrkar hnua Mizoram Institute of Medical Education & Research (MIMER) an din chu, engmah hnathawh awm si loin Zoram Medical College tiin an thlak tih a sawi. SEDP pawh an sem theih mai loh tur thu leh sem thei pawh nise, inthlan dawn kumah a nelnualin campaign nan an sem ang, tia a lo sawilawk tawh chu a dikna a lang mek tih Lal Thanhawla hian a sawi a ni.
Sakhaw zalenna tungding turin Congress kaihthawhin awm mek – Lal Thanhawla
