Centre chuan April 17 khan same-sex marriage (neih inang nei inneihna pawm) chu ‘khawpui mi tha ten (urban elitist)’ vantlang in pawm se an duhna mai a ni tiin a sawi.
Curt chuan same-sex marriage pawmin ‘new social institution’ a siam tur a ni lo a ti bawk a. Judge te chuan Parliament thutlukna siam turin a dah mai tur a ni a, mipui ten ‘inneihna chi hrang hrang’ vantlang leh sakhuain a pawm theih te chu an tichiang zawk mai tur a ni, tiin Centre chuan a sawi bawk.
Sorkar chuan Constitutional Bench Chief Justice of India D.Y. Chandrachud kaihhruaiin same-sex marriage chungchang a ngaihtuah hma lawkin affidavit a thehlut a.
“Social institution thar siam chu duhthlan dik emaw rights anga ngaiha kalpui leh ngaih chi a ni lo” tiin Centre chuan a sawi bawk a. Mimal zalenna leh thuneihna tih hian same-sex marriage pawm theihna a huam tel lo a ti bawk.
Court chuan ‘elitist views’ te ngaihdan leh thlir dan chauh chu a ngaihtuah laiin legislature chuan zau zawkin thingtlang, semi-rural leh khawpuia chengte, sakhua hrang hrang te, personal law leh customs mai bakah same-sex union in inneihna chungchanga dan awmsa a nghawng theih dan te a ngaihtuah vek zawk a ni, a ti bawk.
Tuna inneihna pawm theih leh kalpui heterogenous institution mipa leh hmeichhia te inneihna anga kalpui chu dan leh sakhuaah pawh thianghlimna leh pawm tlan a ni a. Same-sex marriage dan anga pawmna chuan ‘khua leh tui tinte a nghawng ang’ tiin Centre chuan a sawi bawk a.
Centre chuan fundamental rights hrang hrangah pawh heng miin sexual orientation a duh a thlan theihna te bakah right to privacy ang te chu Transgender Persons (Protection of Rights) Act, 2019 hmanga humhim a ni tawh a ti bawk a. “Heng baka rights siam belh, inneih leh inkawpna pawm thar leh dan hmanga humhimsakna ang te leh chutiang inzawmna ang chi te chu judicial ni lovin legislature thutlukna siam tur a ni,” tiin Centre affidavit chuan a tarlang bawk.
“Inneihna hi khawvel ram tinah ram khat social policy huam chhunga awm vek a ni a. Chumi kaihhnawih leh denchhen chuan mipui aiawh ten dan siamin sawifiah a ni a, pawm niin kal hmang siam a ni bawk a, same-sex marriage pawm loh hi legislative policy hmaikhat a ni” tiin affidavit chuan a tarlang bawk.
A hmain affidavit an theh luhah Centre chuan same sex marriage pawm chu mipa leh hmeichhia pangngai tena inneihna ‘holy union’ a nihna tiderthawng theitu leh a thianghlimna leh hlutna tiderthawng thei tiin a lo sawi tawh bawk.
Centre chuan same-sex marriage dan anga klapuia remtihna pek chu a duh lo bau bau hle a. Mahse, Supreme Court ngaihtuah mek lai a nih avangin tunah a ngaihdan sawiin court chuan a ngaihtuah chhunzawm zel rih dawn a, thutlukna siam a la ni lo.
Same-Sex marriage-ah Centre khauh hle
