Daily Newspaper

Samtlang Zo Heritage Centre dinna tur en ho

34

Tourism department hnuaia Zo Heritage Centre dinna tur hmun Samtlang Mualkawi ram chu Nilaini khan Tourism minister Robert Romawia Royte leh Aizawl South-III bialtu M LA Prof Lalnunmawia te hoin Mizo Cultural Organisation (MCO) hruaitute leh Samtlang village council leh YMA Branch hruaituten an en ho. Samtlang khawtlang hruaitute chuan All NGO meeting-in a remtih hnuah vantlang inkhawmin Zo Heritage Centre atana MCO leh sawrkar pek an phal thu minister hi an hrilh. Minister chuan Mizoram sawrkarin Zo hnam hrang hrangte hnam ziarang lanna tur – Zo Heritage Centre bakah North East India-a hnam hrang hrangte ziarang lanna North East Heritage Centre te dahkhawm tum a ni, tiin, sum leh hmunhma awmdan azirin Asia rama hnam hrang hrangte ziarang lanna tur – Asian Heritage Centre te pawh ruahman tel tha a tih thu a sawi. “Thil liantham leh hnam khawih thil a nih avangin a hmunhma tur pawh Aizawl hnaih si ah zau tham tak kan zawng a ni,” Robert Romawia Royte hian a ti a. Zo Heritage Centre hi khualzinmite hipna a nih piahlamah, khawvel Zofate insuihkhawm nan leh inpumkhat nan a pawimawh avangin Mizoram sawrkarin a ngaihpawimawh thu te, Mizorama la awm ngailo leh thil hautak tak ni mahse, Heritage Centre din nan hian foreign funding beisei a nih thu te a sawi bawk. Nilaini vek khan Health minister Dr R. Lalthangliana leh Aizawl East-II bialtu MLA, minister ni bawk Robert Romawia Royte te ruahhmannain Civil Hospital Aizawl Road, Dawrpui kawngko min chu department hrang hrang – PWD, PHE, Power & Electricity, UD&PA, Health Department te leh Dawrpui local council ten an enho. Dawrpui Veng thenkhatin tui pipe chhiat avanga tui an nghei tawh thu report a ni a. A hmuna an sawi ho hnuah Health Department-in a min belh leh hlauhawm laite thiatin hma la nghal se, PHE-in temporary talin tui line chhia zawmin tui nghei mekte tan tui tihhaw nghal a nih theih nan hma la se tiin an rel a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy