Sangliana hmachhawn tur Rinchhana Sailo

Mizoram Wrestling Association (MWA) leh LPS Vision te tangkawp buatsaihin December ni 9-11, 2024 chhung hian LPS Arena, Falkland-ah Mizo Inchaipui (Mizo Inchai Title Fight, 2024) neih a ni dawn. Mizo Inchaipui ah hian palian champion Lalsangliana chuan amah chotu Lalrinchhana Sailo, N. Vanlaiphai a hmachhawn dawn. Mizo Inchaipui 2024-ah hian kawnghren chuha inchai dang pali a awm dawn bawk.
Palian champion ni mek Lalsangliana, Upper Republic hian kum 214 palian inchaiah champion lai Lalnunfela a hneh a, palian champion a ni tan. Inthununna nei tha leh chak chungchuang Lalsangliana hian kum 10 chhung zet a kawnghren a humhim tawh a, amah hneh thei an la awm lo. A peih chhung champion thei hial tura ngaih Sangliana hi palian champion rei ber dawttu a ni mek a, a chungah hian kum 15 lai champion R. Vanlalduata a awm mek. A kawnghren chuhpuitute hneh chho zel Sangliana hian December ni 11 zanah Lalrinchhana Sailo a hmachhawn dawn a, a kawnghren humhim turin fiahna hautak a hmachhawn a ngai dawn.
Palian champion Lalsangliana leh amah chotu Lalrinchhana Sailo te hi 5.11ft a sang ve ve an an ni a, an intiattawk thelhthlawlh hle. Sangliana hi 118Kgs a rit a ni mek a, a buan tur Lalrinchhana hi 97kgs a ni mek thung a. Rih zawngah chuan Sangliana hi kg 21 zetin a rit zawk mek a, an inbuan hunah meuh chuan a inthlauhna hi zim chho duai tura ngaih a ni. Lalsangliana hmachhawn tur Lalrinchhana Sailo hian hriat la hlawh lutut lo mah se Sangliana chotu tur zawnnaah a chungnung ber a, title fight hmachhawn turin a tling. Sangliana buan tur a nih miau vangin ngaihven a hlawh a, inlehthalna lian thlentir a, palian champion nih ngei tumin a inbuatsaih uluk hle.
Tarlan tawh angin Mizo Inchaipui 2024-ah hian title fight panga a awm dawn. Palian champion Lalsangliana leh Lalrinchhana Sailo te an inbuan bakah Palaihawl champion Remruatpuia’n amah chotu Ngursangzuala a hmachhawn ang a. Pate-ah B Lalawmpuia leh Lalchhanhima te an inhmachhawn ang. Pate huanga kawnghren inchuh turte hi he huanga lo champion tawh ve an ni a, inbuan hmuhnawm tak an lantir ngei a beiseiawm. Heng bakah hian Nulian huangah Lalhmangahsangi leh Zodinpui ten kawnghren an inchuh ang a. Nulaihawl ah Elizabeth Rohlupuii leh Penticost Lawmsangpuii Varte te inhmachhawnin, nute huangah Lalvenhimi leh Lalnuntluangi ten kawnghren an inchuh bawk ang. Palian champion lai Lalsangliana hian cheng nuai khat a hlawh ang a, a chotu Lalrinchhana Sailo in Rs. 50000/- a hlawh ve thung ang. Category danga kawnghren inchuh turte hian champion laiin Rs. 50000/- theuh an hlawh ang a, an mahni chotuten Rs. 30000/- theuh an hlawh ve thung ang.
Mizo Inchaipui 2024 hi zan thum chhung neih tura ruahman a ni a, zantin zan dar 8:00 ah tan tum a ni. Kawnghren inchuh bakah hian zan khatah exhibition match pahnih zel a awm ang a. Exhibition Match a inlante hian Rs, 5000/- theuh an dawng dawn bawk a. Mizo Inchaipui 2024-a lawmman sumfai semchhuah tur zawng zawng hi Rs.6,10,000 zet a ni.
Mizo Inchaipui 2024 buatsaihtu tur MWA leh LPS Vission te chuan September 19, Ningani khan Press Club-ah thuthar thehdarhtute kawmin, Mizo Inchaipui neih a nih tur hi an puangzar. He hunah hian champion te hren tur kawnghren thar tlangzarh nghal a ni a. Kawnghren thar sponsortu Samoo Dawr neitu Samuel Vanlalhriata, MWA Jt Secretary ni bawk chuan a tlangzarh.
Mizo Inchai
Mizote hi mi chak ngaina leh ngaisang hnam kan ni a. Ka pipu te hun atanga tun thlengin mi chak, tharum ngahten ngaihsan an hlawh a. Kan pipute kha ral leh Sa hlau reng renga awm an nih avangin khawtlang mipuite thlamuan turin Pasaltha, michak an nei thin. Thangthar khawvelah Mizo michakte lansarhna hun Inrun leh Indo a tawp a, ral hlauh leh Sahrang hlau reng renga hun an hman a tawp a. Khaw kar kawngah mi ruang zawn inchuh a awm ta lo. Mizote thinlungah michakten hmun an la luah reng a, Zawlbuk chhunga inbuan mai duhtawk lovin michakte lansarhna turin tunah chuan Mizoten dan bik a neih, Mizo infiamna bik, Mizo Inchai chu chhawp chhuah a ni ta thin a ni.
Kum 1971 ah Mizoram Wrestling Association din a ni a, kum 1972 atangin Mizo mi chakte chawi larna turin incho leh incho in Inchai buatsaih thin a ni a. Tun hma lam kha chuan thiamna thuk tak an nei lova, a chak zawk, tharum ngah zawkte kha an dingchang mai thin. Hun a lo kal zel a, Mizo Inchai chhungah infiamna hrang hrangte nen belhbawmin inchai chakten chak zawk an lo zawng chho thin. Tharum ngah leh chak kha chak zawk teh nan hman a ni ta lova, thiamna nei bikte chuan chungnung zawkna an neih tak zel avangin tun hunah chuan tun hmaa Mizo inchai leh tun hnua Mizo inchai chu danglam tak a ni tawh a ni.
Tarlan tawh angin kum 1972 atangin kum 2022 thleng khan Mizo Inchai Palian Champion zawnna vawi 22 lo huaihawt tawh a ni a. Hemi hun chhung hian mi 10 chiahin chak ber nihna an chang tawh a. Palian champion lo ni tawhte chu; Vanlalkulha, Zembawk, F Tlangsiama, Nursery, Chalchungnunga, Lunglei, R Vanlalduata Zemabawk North, Saidingliana Sailo, Darlawn, Dominic Lalremsiama, Chaltlang, LR bawlliana Chanmari West Aizawl, F.Lalhmingmawia Kolasib, Lalnunfela, Salem Veng leh Lalsangliana, Upper Republic te an ni.