Zanin zan lai dar 1:30 hian Champions League last 16, second leg khelh chhunzawm a ni dawn a. Anfield-ah 5-2 ngawta tlawm tawh Liverpool chu Santiago Bernabeu-ah an lenglut dawn. Serie A hmahruai mektu Napoli pawhin Eintracht Frankfurt an mikhual ve bawk ang.
Santiago Bernabeu a lenglut tur Liverpool hi season kal mekah an chetha tawk lova, an game a ngheh loh vangin an khelh dan tur rinlawk thiam pawh a har hle. An khelh that ni chuan 7-0 ngawta Manchester United sawp thei team an ni a. United an sawp hnu lawkah AFC Bournemouth hneh lovin an tlawm leh ringawt thung. Heti hi an nih vangin an ngam loh thin Real Madrid lakah engtin nge an inlan ang tih rin thiam a har a. Si thum fai ngawta hnufual sa an nih vangin Real Madrid lehthal tur chuan thil mak ropui bik an tih ngei a ngai ang.
English club zingah Europe a hnuhma nei tha ber Liverpool hi an khelh that ni a nih chuan Real Madrid lehthal thei tura theihna nei an ni a. An khelh that ni a nih loh erawh chuan Santiago Bernabue-ah ngei si tam zawk phur thei dinhmunah an ding dawn. Dar 1:30 atangin fiahna hautak an hmachhawn dawn a. Real Madrid leh Liverpool in hmachhawn nawn leh tur hi football ngainatute en chak a tling.
Season kal meka team che tha thlang dawn ila Napoli hi sawi hmasak ngai tur an ni. Italian Serie A ah point 18 zeta hmahruai fal mek Napoli hian Mimualah si hnih faia an lo hneh tawh Eintracht Frankfurt chu Stadio Diego Armando Maradona-ah an mikhual dawn a. Naples hi quarter-final lut turin an dinhmun a tha viau tawh a. Inelna lianah champion tumin tan an khawh dawn a. German club hneh nawn leh ngei an tum ang.
Santiago Bernabeu-ah Liverpool
![](https://theaizawlpost.org/wp-content/uploads/2023/03/santiago.jpg)