Danin a phal loh saphu kawr hmanga sumdawng mi pahnih chu court-in sumfai chawi turin a hrem.
2023 September 15 khan Mizoram EF&CC department leh sawrkar laipui hnuaia Wildlife Crime Control Bureau tangdun chuan saphu kawr kg.24.5 an kawl avangin mi pahnih – David Lalthutiama (56) Ainawn Veng Aizawl leh Lalvarsanga (33) Sakawrdai Aizawl district an man a, Wildlife (Protection) Act 1972 hnuaiah thubuai siamsak an ni.
Wildlife (Protection) Act 1972-ah chuan saphu (pangolin) hi schedule-I a dah niin, dan loa saphu kawr hmanga sumdawngte chu he dan Section 51 (1) in a sawi ang chuan kum 3 atanga kum 7 thleng lung in tantir leh Rs. 25000 aia tlemlo chawitira hrem tur an ni.
He thila inhnamhnawih mi pahnih hi Aizawl Judicial District judicial magistrate first class-II court chuan an chungthu ngaihtuahin February 19 khan thiam loh chantirin hremna a pe a, Rs. 10000 ve ve chawitirin, an sum chawi tur hi an pe thei lo a nih chuan ni 90 chhung jail-ah tan tir (simple imprisionment) turin a ti.
Mizoram rohlu, ramngaw leh nungchate nasa lehzuala humhalh kawngah leh dan bawhchhetute zawnchhuah kawngah thawhpui zel turin EF&CC department chuan mipui a ngen a ni.
Saphu kawra sumdawng mi pahnih court-in hrem
