SASCI project hmanga chhim lam tihhmasawnna tur sawi

SASCI sum leh sum dang hmanga Mizoram chhim lam, a bikin Lunglei tihhmasawnna tur hrang hrang chu chief minister Lalduhoma’n a sawi.
Zirtawpnia HPC Cup hmawr bawkna a hmanpuinaah chief minister chuan, C Thuamluaia Mual chu Lunglei mipui punkhawmna leh programme pawimawh tam ber dawltu a nih angin a mual chu tha tawk hle mah se, lirthei dahna tur parking area a mumal lo hle tih sawiin, a tawntirhah cheng vaibelchhe 3 man multi- level car parking siam mek a ni a, hei hian harsatna tam tak a sutkian a beisei tih a sawi. Zan lama inkhelh theiha siam turin flood light dahna sum vaibelchhe 5 chu SASCI 2026–2027 Priority Project-ah dah a ni a, infiammite leh mual hmangtute mamawh inthiarna tha zawk leh dressing room tha a awm theihnan HPC District Annual Fund atanga cheithat turin ruahman a ni tih a sawi.
ATL Road chu national highway-a puansak turin Ministry of Road Transport & Highways hnenah a dil thin a, national highway lo awm tawh sa a awm avangin, parallel-a national highway kaltir chu an kalphung a nih loh thu sawiin an lo hnar thu a, Aizawl – Thenzawl chin tal puansak tura a dilna erawh remtih sak a ni a, NHIDCL-in DPR siamtu tur zawnna tender an tichhuah mek a,tender hi tun thla tawpah hawn a ni dawn tih a sawi.
NHIDCL chuan Aizawl- Thenzawl National Highway alignment chu kumina peihfel a, nakuma sanction neih hman an tum tih a sawi a. ATL Road Haulawng to AOC Ramthar inkar km. 34.78 chu SLT Infracon Pvt. Ltd-in a thawh mek a, a bak zawng km 29.22 chu sanction leh hmabak a ni, tiin, hna thawh mek chu package 4-a then a ni a, a vaiin March 2027 chhunga zo tura tih a nih thu a sawi.
Kar hmasa khan SASCI 2026- 2027 Part-I atanga hna thawh tur thlan fel a ni tih Lalduhoma hian sawiin, chutah chuan chhim lam hmasawnna tur hna hrang hrang – Lunglei AOC (Ramthar Veng) atanga Lunglawn Three Gate inkar kawng siamthatna tur cheng nuai 377, Lunglei Venghluna Multipurpose building sakna tur nuai 571, Phairuangkaia Agriculture Link Road laihna tur nuai 265, Sawmngai atanga Nisapui inkar economic road laihna tur nuai 274, Lungsen atanga Phairuangchhuah inkar PCC kawng siamna tur nuai 416, Zawlpui atanga Khantlang Zau inkar Agriculture Link Road laihna tur nuai 200 leh Dengsur atanga Damdiai Zau inkar PCC kawng siamna tur nuai 346; Hnahthial district-a Rotlang East khuaa Agriculture Link Road laihna tur nuai 224, Hnahthiala 132kV Sub-Station bunna tur leh Hnahthial leh Thiltlang inkar 132kV D/C hrui thlunna tur nuai 2685 leh East Rotlang Water Supply Scheme siamna tur nuai 400; Lawngtlai district-ah Lawngtlaia Lairam Christian Nursing School Hostel building sakna tur nuai 345 a tel tih a sawi.
Chief minister thusawi dang:
8 Urban Infrastructure Development Fund 2025– 2026 atangin Lunglei tan cheng nuai 525 dah a ni a, Lunglei Park cheng vaibelchhe 2 senga cheithat tura peih fel a ni tawh a, Lunglei khawpui chhungah vantlang inthiarna pali cheng nuai 25 theuh senga siam tura peih fel a ni tawh a, Lunglei khawpui chhung hmun hrang hranga kea kalna footpath siamna tur nuai 225 ruahman fel a ni tawh tih a sawi.
8 SASCI Project cheng vaibelchhe 55 sengin Lunglei tui lak tihchangtlunna, Upgradation of Greater Lunglei Water Supply Scheme (GLWSS) project thawh mek chu zaa 80 zawh a ni tawh a, Febuary 2027-a zawh hman tum a ni. AMRUT 2.0 project hnuaia nuai 997.78 senga GLWSS tihchangtlun hna thawh mek chu zaa 99.95 zawh a ni tawh tih a sawi.
8 Lunglei Municipal Council hnuaia Lunglei tihhmasawnna tur project pawm tawh engemawzat zingah – cheng vbch. 4 senga Sazaikawa LMC Complex sak tur, vbch. 5 senga Saikuti Hall cheithat tur, vbch. 3.5 senga Theiriata Transport Hub sak tur leh vbch. 2 senga Ramthar AOC-a Marketshed sak tur a tel tih a sawi.
8 Mizoram State University (MzSU) chu Lungleia dah tura ruahman fel a ni tawh a, a tul anga bawhzui mek a ni. Mizoram Engineering College (MEC) Pukpui chu luah theiha cheithatna atan a pawhna kawng siamna cheng nuai 1012 (MPWD kutah), tui pekna leh dah khawlna atan nuai 249.44 (PHED kutah), eng pekna leh transformer bunna nuai 106.36 (P&ED kutah) leh H&TE kutah campus tihchangtlunna, hmanrua leh bungraw hrang hrang leina atan nuai 1435.39 dah a ni. P&ED leh PHED ten an hna an zo tawh a, PWD-in hna zaa 40 an zo tawh a, H&TE atanga campus cheithat hna (physical work) zaa 40 vel zawh a nih tawh a, a tul ang ang chak taka bawhzui zel a ni dawn tih a sawi.