SASCI project nei department ho
inthlahdah lo turin CM-in a chah
Sawrkar department thenkhata thawktute inthlahdah vangin SASCI kaltlanga hna tha taka thawktu department dangte a tih khawtlai phah theih avangin thawktute inthlahdah lo turin chief minister Lalduhoma’n a chah.
Chief minister kaihhruai hian Thawhtanni khan Special Assistance to States for Capital Investment (SASCI) hnuaia department hrang hrang kaltlanga hma lak dan thlirlet a ni a. SASCI chu department hrang hrang kaltlanga hmasawnna hna thawhna tur a nih angin, hmalakna a hun taka zawhfel thin a nih theihnan ngaihpawimawh a tul tih a sawi.
SASCI hnuaia hna tha taka thawhin a kum leh ruahmanna kalpui dan tur nasa takin a hril lawk tih sawiin, department hotute chu a hun taka hna zo fel hman turin a chah a. A tul dan azirin department hrang hranga thawktute pawh indawrtawn zung zung thin tur leh an hnuaia thawktute uluk taka vila enpui thin turin a chah bawk.
Finance department buatsaih, kum 2020- 2025 chhunga SASCI hnuaia project hrang hrang dinhmun chu Finance secretary Ramchuana’n powerpoint presentation hmangin a sawizau a. Kum 2024- 2025 chhunga project kal lai, expenditure sanction la awm lo – PWD hnuaiah project pathum, Agriculture & FW hnuaiah project pathum, DM&R hnuaiah project pahnih, UD&PA hnuaiah project pakhat bakah FCS&CA, Tourism, Land Resources & SC leh Irrigation & WR hnuaiah project pakhat theuh thlirlet a ni.
PWD hnuaia Working Women Hostel sak hna chak zawka bawhzui dan tur leh PM Ekta Mall (Unity Mall) sak hna sawt zawka kalpui dan tur sawiho tel a ni.
Thutkhawmah hian Home minister K Sapdanga, PWD minister Vanlalhlana, EF&CC minister Lalthansanga, Agriculture & Farmers Welfare minister PC Vanlalruata, Health & Family Welfare minister Lalrinpuii, Power & Electricity minister F Rodingliana, Sports & Youth Services minister Lalnghinglova Hmar leh adviser to chief minister (Finance & Planning) TBC Lalvenchhunga an tel a. SASCI hnuaia project nei department hotute an tel bawk.
SASCI project nei department ho inthlahdah lo turin CM-in a chah
