R.Lalrinkima
Hidden Lodge
Chanmari, A izawl
Special Assistance to State for Capital Investment hi mipui mimir hian kan hre thuk lutuk lo nain ‘State tan abik a, SASCI Guidelines in a phal chin, thil pawimawh, rotling siamna atana pawisa hman tur, kum 50, pung awm loa Loan hmuhna’ ti ila a dik ve tho awm e. Nimahsela, kum 50 hnuah hian heng zawng zawng, SASCI huanga pawisa hmuh hi rulh leh tur a ni a(ngaihdamna thuchhuah a awm thut a nih loh chuan?), a rulh hun hi a lungngaih thlak hle. Chuvangin, he sum hmanga kan hnathawh te hian return an neih loh phei chuan State Budget-a rulhna tur dah pawh a huphurhawm viau awm e. Department thenkhat chan vawng tak te hi an Minister ten an Department chan an tan thahnem an ngaih vang a tih theih ve tho ang a, mahse, a rulh leh hunah chuan ngaihtuahna sen a hahthlak ve ngawtin ka lo ring ve mai mai?
Tichuan, kum 2025-2026 (April 2025 to March 2026) chhunga thawh tur, mahse a thawh zawh hun tur kum khat emaw kum hnih emaw tana Mizoram sawrkar in Part hrang hrang, Part-IX, Part-XA, Part XA(Part-III leh Part XB te a pawisa hmuh chu Rs 645.00 Crore a ni a, Pu Zoramthanga sawi dan takin, ‘cheng nuaih 10000(sing bi) hlir hmun ruka chheh bakah nuaih cheng nuaih 4500 chheh khat’ tihna a ni mai awm e, a tam hem hem hle mai. He pawisa hi Finance Department, Government of Mizoram, Expenditure Control Branch chuan letter no G-21/283/2025-EC-FD Dt 19.3.2026 khan hman theihna ‘Blanket Administrative Approval’ (part hrang hranga then sawm te) Department hrang hrang hmangtu tur leh an hman zat tur a ti chhuak a, chungte chu:-
Part IX (Incentives to States for Efficiency in Financial Management) = Rs 350.00 Crore (kum khat chhunga hnathawh zawh tur niin, hna sawmthum pariat awm te chu Department 16 ten an insem) Part-XA (Urban Planning Reforms: Governance, Finance & Urban Land & Planning) = Rs 143.00 Crore (kum hnih chhunga hnathawh zawh tur niin, hna thawh tur pariat awmna hi UD&PA Department in a pum hmawm) Part-X A (Part-III) : Urban Land and Planning Reforms-Theme Based Greenfield Cities) = Rs 40.00 Crore (kum khat chhunga hnathawh zawh tur niin, hna thawh tur pali awmna hi UD&PA Department in a pum hmawm bawk) Part XB (Urban Planning Reforms-Compliance Reduction & Deregularisation for Ease of Doing Business) = Rs 112.00 Crore (kum khat chhunga thawh zawh tur niin hna sawmhnih paruk awmna a ni a, Department 10 ten an inthawh sem ang) Part hrang hranga hna chan tam lam ni pah fawmin an hnathawh tur hlut zawng sum zat te han sawi pawr pawr leh ila:-
Part IX – Sum hman/enkawl thiam lawmman (Kristian State ti-a chhal chuan dawng ngei ngei tur kan ni?) tih takah Finance Department chuan hma rawn hruaiin Financial Management atana an sum mamawh Rs 10.00 Cr chu an chang a. PWD chuan hna chang tam berin an sum hman tur hlut zawng hi Rs 131.40 Cr a ni a, kawng siam that ilo leh building sak nan a ni tlangpui a, Engineer te hmuia chithlum tah nan MINECO-a Engineers’ Centre(Building tihna a nih hmel) sakna tur pawh a tel. Power Supply/Distribution system tih changtlunna tur lam atan P&E Department chuan Rs 60.39Cr an chang a, Power siamchhuah tharna tur lampang chu a awm lo nain DPR pawh engmah la awm lo Tuichang Pump Storage Scheme (Vankal) atana Civil Infrastructure Works atan Rs 12.00cr lai a awm thung? Irrigation & Water Resources Department hian hmalak nasat an tum nia hriat theih turin PHE Depatment chan aia let hniha tam Rs 52.11 Cr an chang. An hnathawh turah hian Vantawng-Tuirihiau Integrated Water Conservation and Eco-Tourism Project tih a awm a, Rs 9,84 Cr lai man niin Eco-Tourism a nihna laiah Tourism Department hmalakna awm tak ni te pawhin a hriat theih a? (PHE lamin Restricted Tender hmanga Conservation & Rejuvenation of Vanva Water Body, Rs 5.00 Cr man M/S Gangwal Engineering & Construction Co.Pvt Ltd hnena an thawhtir te pawh kha Soil & Water Conservation lam chan niawm tak tein ka ngaituah a. Vanva water body hi engtianga humhalh a han tuai thar ngai ta nge a nih tih te pawh ngaihtuahnaah a lo lut teh nuaih a?) PHE Department hian Rs 20.00Cr changin hma thar/Scheme thar kan buaipui aiin an scheme awm tawh sa tih changtlunna lam an hawi a, hna zawh hun tur hi a rei loh em avangin scheme thar han sual na chi a ni lo bawk reng a ni.
He lawmman zar zotu tur Aizawl leh Saitual District, Upate In(Old Age Home) sakna tur hi khaw thlan bik chu awm lo mahse a lawmawm hle a, chutih rualin Indoor Volleyball Hall(sakna hmun tur tarlan loh) te, MHIP Headquarter chei thatna tur te leh Construction of Football Playground Pavillion/Gallery,Volleyball Coutrs,Futsal Grounds in nine(9) Districts of Mizoram(excluding Siaha and Lawngtlai tiha Rs 10.00 Cr dah hian thliarkar rilru min ti hrechhuak alawm le? Tin, veng khat LC house leh Upa Pawl building sakna turte pawh lo langin Community Hall sakna tur pawh a awm nual a, lawmman zar zotu an tam viau e.
Part X(A) leh XA(Part-III) chu UD&PA huangah Rs 183.00 cr a lut a, XA(Part-III) ah phei hi chuan Thenzawl khuain Rs 20.00 Cr lai changin Rs 20.00 Cr lai man- Lau River Rejuvenation and Flood Mitigation lamah te pawh hma an la dawn a ni. Hnathawh tur tarlan zingah Lammual chei thatna tur Rs 56.82 Cr leh Aizawl khawchhunga Tuiluankawr siamna tur(storm water drainage tih a ni a, furpui tuihawk dawl zo tur luikawr a nih hmel e) Rs 35.00 Cr man te hian mit an la a. Lunglei khawchhung cheibawl tharna atana Rs 12,62 Cr dah pawh hi a puitlin meuh chuan Lunglei khaw hmel a ti mawi sawt turah a ngaih theih awm e.
Part XB –a Rs 112 Cr awmah hian PWD chuan Rs 28.36 Cr a chang a, P&ED in Rs 13.51 Cr, PHE-in Rs 12.13 Cr, UD&PA chu la tel zelin Rs 18.00 Cr lai an chang leh a. Tunhma 1980 hnukhawi lama PHE in an thawh thin Rain Water Harvesting hna, (I&WD hian an thawk ta nge ni?) Ngur leh Vapar (Champhai District) khuaa kawng laih hnathawk turin Irrigation & Water Development Department lo langin Rs 12.00 Cr lai provision an chang bawk. Commerce & Industries Department in Rs 9.50 Cr an chang bawk a, hengte hi he part huanga chan vawng zual te an ni. Tunhnaia sawi hlawh ve tak Ekta Mall, Chawnpui-hnathawh leh sum pek inmil lo an tih fo panna kawng siamna tur Rs 2.00 Cr pawh PWD kutah a lut a, DPR lamah an lo telh lo tihna te pawh a ni ange? Tin, Serchhip lam chanchinbu mite tana thu lawmawm tak MJA building sakna tur Rs 2.50 Cr pawh a lo lang a, PWD bawkin an thawk dawn a ni. UD&PA-in an hui vek Part hnih tihloh-ah chuan ‘a serh zinga mei ang’ tih ang deuhin Community Hall/Multipurpose Community Centre pahnih lai sakna tur pawh awm pawh UD&PA kutken tur an la ni cheu a ni.
Heti hian he pawisa hi Department hrang hrang te insem dan han khaikhawm ila (Figure hi Crore bi zel an ni e):-
1) UD &PA = Rs 209.10
2) PWD/P&PI = Rs 171.79
3) P&E = Rs 73.90
4) I&WRD = Rs 69.11
5) PHE = Rs 32.13
6) SYS/MSSC = Rs 18.00
7) P&PI/Sc & Tech = Rs 16.80
8) Finance Deptt = Rs 10.00
9) C&I = Rs 9.50
10) P&PI = Rs 7.00
11) AMC = Rs 6.00
12) P&PI/Sc & Tech/PWD = 5.50
13) H&FW = Rs 5.00
14) TOURISM = Rs 5.00
15) SWD = Rs 3.45
16) AGRI &FW = Rs 3.00
17) RD = Rs 2.70
18) GAD = Rs 2.02
(P&PI hi Planning & Programme Implementation tihna niin anmahni puala an chanbil chu Sl no 10 a ni a. PW leh Science & Technology Department nen Sl No 2, 7 leh 12 ah te an thawk ho dawn bawk a, engtianga hna hi thawk ho tur nge an nih erawh ka hre ve pha lo)
Tlangkawmna
Assembly House Leader in House zahawm takah ‘SASCI sum a lapsed loh nan hriatthiamna sang tak Central lamin min nei a, hnathawh zawh loh pawh final Installment hmuh nan Utilisation Certificate rawn siam mai teh u an tih vangin kan siam a, SASCI sum hi keini hunah hian lapsed a awm lo’ ti ang deuh khan a sawi laiin ZPM party office lama a Minister pakhat thusawi ngaihthlak erawh chuan ‘dawt-a UC siam chuan chunglam malsawmna pawh dawn loh mai a hlauhawm avangin UC lem hi kan siam lo a, SASCI sum chu dik takin lapsed mai se ka ti’ ti ang deuh khan a sawi ve leh thung a, hlin ber tur pawh hriat a har ta? SASCI sum hi then hrang engzatnge awma Zoram hian engzatnge kan dawn ve thin chu hre ve kilh kelh lo mah ila ka hriat ve chhung a chunga mi khi ka han tarlang ve mai a ni a. SASCI Part-I sum a lapsed ngei a ni tih Lalremliana Pachuau Zoram Darthlalang Utube channel lamah ka lo ngaihthlak atangin ka lo hria a. Tin, RTI chhanna an dawn ngei atangin 2025-26 chhunga Part-I hnuaia sum hmuh Rs 328.00 Cr atangin Rs 111.52 Cr chu ZPM Ministry hnuah a ‘lapsed’ ngei tih a chiang a. MNF Ministry hnuhnung zawkin an tih ‘lapsed’ zat erawh MNF hotu pakhatin ‘kan ti lapsed lo’ a ti a, insawifiah tum reng renga khawsa an ni a, sawi zui lo mai ila, Utube lama kan lo ngaihthlak ‘thutlukna chu nangman i siam thei e” an tihah hian duhtawk mai teh ang?
Hun tiam neia hnathawh zawh tura tih a nih anga zawh loh vang te, sum hman dan tur kaihhruaina anga hman a nih loh avang te, hnathawh nana pawisa hman hun chhung tur bituka hman loh vang te leh Utilisation Certificate pek loh vangin SASCI sum hi lapse thei a ni. Chuvangin sum hi a awm veleh hnathawktu chuan ‘mawng vawm ba ang” maia thawh ngai a nihzia a lang chiang hle thung. He Rs 645.00 Cr hi 2025-26 chhunga hman tura Blanket Administrative Approval pek a nihna thuchhuah ni hi 19th March 2026 a ni a, financial year ang chuan hman zawh rual niin a lang lo a, engtiang chiaha sawrkar kumthar 2026-27 a hman theih nge a nih tih keini ang thil hre tlem tan chuan hriat ve ngaihna a awm lo a. 2025-26 chhunga kan hmuh hi 2026-27/28 ah hman zawh tur tihna te pawh a nih hmel viau zawk e. Eng zat chiah nge he sum hi a lapsed tih pawh kan hre leh turah ngai teh ang?