Mizoramin SASCI (Special Assistance to States for Capital Investment) sum, vaibelche 233.36 hman hman loha a kirtir a nih tak chhan chu sawrkar kalta in hna a thawh muan vanga hman theih tak loh a ni tih chief minister Lalduhoma chuan a sawi.
SASCI sum hman dan hi sawrkar laipuia Ministry of Finance hnuaia awm vek niin, part-I atana pawisa hmuh a nih hnu ah 2nd instalment hmu leh turin hna zaa 75 zawh a ngai a, hei hi zawh hman a nih loh chuan a lapse thin a, tun sawrkarin a tih lapse nia sawi cheng vbch 233.36 chu sawrkar hmasa atanga hna an lo inpek tawh, zaa 75 an la zawh loh avanga 2nd instalment an hmuh loh nia sawin, sawrkar hmasa in hna an thawh muan vang a ni tih a sawi.
Sawrkar kaltaa chief minister ngeiin SASCI sum chu MLA tin hnenah 2023 MLA inthlanpui tinzawna pek a ni tih a sawi thu Lalduhoma hian sawiin, inthlan thlir chunga inpe an nih avangin an muang sual ta a, hetiang chiah hian Congress sawrkar pawh NLUP ah a lo muang sual tawh tih a sawi a ni.
SASCI hnuaia hna lo pek chhuah tawh chu engmah cancel awm loin ZPM sawrkar in a thawh chhunzawm tir a, hna erawh tha se an duh avangin an duh uluk tih a sawi a ni.
Sawrkar laipui ruahman angin SASCI chu Covid leng vanga state tinten thawkchhuak leh thei thil tangkai dinna atana an hman tura duan a nih laiin, sawrkar kalta khan inthlana tlin lehna thlir ranin a thensawm a, sum hman dan a dik loh avang hian tunah pawh Mizoramin a dawn tur cheng vbch. 500 chu vbch 250 a tih hniam a nih phah niin a sawi bawk.
Tun sawrkar chuan he sum an dawn hi tangkai takin a hmang dawn tih a sawi a. Project 8 siamin centre-ah an thehlut tawh a, district jail thawmthatna atan, Aizawl khawpui chawmtu tui hnianghnar zawka lakna atan, Lunglei khawpui chawmtu tui lakna atan, Aizawl tui lakna awmsa thawmthatna atan, district 11-a zirtirtu quarters sakna atan, sawrkar quarters hrang hrang sakthat leh sak belhna atan, Industrial Training Institute tih changtlunna atan leh Tuirial Hydel Project tihchangtlunna atan te hman tum a ni tih a sawi a ni.
Chief minister chuan nikum March thlaa GST lut leh kumin March-a GST pun dan khaikhinnaah Mizoram chu India ram pumah lalut tha ber a ni tih a sawi bawk.
Thuthar thehdarhtute zawhna CM-in a chhan:
8 Eirukna kawngah kan la fihlim zelin kan hria a, fihlim lo kan lo awm palh a nih chuan engtik lai pawhin action la turin kan inpeih.
8 Thlai thar lei tura ruahman sa, leitu tur ho hi a area azirin kan then hrang nuaih dawn a, a leitu tur dawr mek an awm.
8 Agriculture link road 46 kan lai dawn, Hnd Holding Policy hlawhtlinna tura ruahman a ni.
8 Hmunphiah chinna hmun, hmun 6-ah warehouse lian deuh kan sa dawn. A sakna tur sum pawh Finance department-in a pe fel tawh. MP inthlan model code of conduct hlih a nih veleh Forest minister Pu Lalthansanga hoin an bawhzui ang.
8 Horticulture leh department dang atangin warehouse 20-30 sak belh tur kan nei a, sum kan nei sa diam tawh. Hei hi chu sawhthing leh hmarcha ho vel tinzawn deuha ruahman a ni.
8 Complaint box siam kha a duh tana tih a ni a, Mipui Aw siam a nih tho avangin, tih ngei nggei tura tih a ni hran lo. Mipuiin mahni in lum atang pawha sawrkar an dawr theih nan Mipui Aw hmang tangkai turin kan chah.
8 Contractor nih dan hi a har viau a, tih awlsam tur a ni kan ti. Contractor ni lo, nih duh tan awlsam taka an luh dan hi siam ila, a tul chuan class 4, 5, 6 7 thleng pawha awm turin. Contract hna thawk duh contractor-a a in register zung zung theih nan kawng hawn kan rel. Cabinet pawmpui tura chhawp mek a ni.
8 Tender chungchangah restricted, open, limited tender leh departmental works hi dan awmsa, manual behchhana kalpui vek a ni. Sawrkar inthlak vangin tih lo ngawt theih a ni lo. Keini kan ngaihpawimawh ber chu a hna a tha tur a ni, tih a ni. Departmental work a awm miah loang tih hi kan sawi ngai lo. A pawi ber chu, hna kan thawk chhe lutuk thin kha a ni a, chuvangin hna a tha tur a ni, kan ti.
SASCI sum lapse chhan sawrkar kalta hnathawh muan vang – CM
