Saudi atanga Qatar lama insawn Firmino
Aizawl Sipai Lammuala rawn inkhel tawh zinga footballer hming hraw ber Roberto Firmino chuan Saudi Pro League club Al Ahli chhuahsanin Qatar club Al Sadd a zawm tih a nemnghet.
Liverpool forward hlui Firmino hian kumin May thla khan Al-Ahli chu Jeddah khawpuiah Asian Champions League Elite title lakpuiin, Arab ram bawkah a insu8an zui ta a ni.
Qatar Stars League champion Al Sadd-a kum hnih daih contract a ziah rualin Brazil international chuan a chhuahsan tak club-a kum hnih a khawsak chhunga history thar an siam thei avangin a hlim hle tih a sawi a, Saudi club-in Firmino thlahna thusawi video an tarchhuahah chuan, “a hun duhawm ber chu Asia champion kan nih tum kha an i a, kha kan hun tawn avang khan ka hlimin, ka lawm takzet a ni,” a ti.
Anfield club atanga sum tamna Arab a pan hnu khan Firmino hian season hnih chhung Al Ahli-ah a khel a; a club tharin khawmualpui huap title hmasaber an lakna kawngah a thawhhlawk a, Asian Champions League Elite-a an champion theihna kawngah khan game 12 khelin goal ruk a thun tling.
May thla final-a Japanese club Kawasaki Frontale an hnehna goal hnih kha a siamchhuah ve ve niin, a club-mate pahnih Riyad Mahrez leh Édouard Mendy-te nen khan Asia leh Europe-a continental title ve kawp thei player hmasaber an ni ho ta nghe nghe.
Kha tournament-ah khan a chetthat em avangin Firmino k ha ‘most valuable player’ atana thlanchhuah a ni hial a ni.
Kum 33 mi club thar Al Sadd hian season liamta khan domestic title an lak avangin tun season-ah hian Asian Champions League Elite an khel dawn a, Brazilian hian Qatari club hi champion-pui zo leh tak ang maw?
Saudi atanga Qatar lama insawn Firmino
