Aizawl Sahuan atanga savawm chhuak chu chhuizui zel ala ni a, hmuh tur a awm bakah a hnu ni ngeia ngaih hmuh a ni bawk a, hetihlai hian a awmna lai bawra thisen hmuh tel a nih avangin kutthlaktu an awm nge tih finfiah tumin thisen hi enfiah tum a ni.
Aizawl Zoological Park director sawi danin, savawm chhuak hi Sahuan ramchhung pawnlamah a awm tawh tih an sawi tawh hnu ah April 20 (Inrinni) zan dar 11.00 khan Lungverh peng thlen hma, tuikhawhthla bulah Sairang lam pana lirthei tlan thla chuan a kawng kan tum tawkin, savawm hlauthawng hian kawng chhak lam a pan chho leh tih report dawn a ni a; a tuk zing dar 2.30 ah Sairang Sihhmui rel station sak lai mek chhak lamah savawm hian thawm a nei tih report dawn a ni bawk.
Heng report bawhzui hian Forest department Aizawl Wildlife Division staff-te bakah Dampa Tiger Reserve leh Thorangtlang Wildlife Sanctuary-a wildlife guard, ramsa zeizia hrechiang bik leh sa hnu chhui thiam bikte chuan savawm an hmu nia an sawina lai hi luhchhuah nghalin a hnu an chhui zui a. Hemi ni hian amah tak hmuh ni lo mah se, a hnu thar ni ngeia hriat chu Lungverh peng thlen hma tuikhawhthla chhak lam ramah hmuh a ni.
April 22 khan nilenga chhuizuiin, tlai dar 5.30 ah savawm hnu an chhui tawpna ramah hian savawm thang (trap) kam tuma an inbuatsaih mek laiin, mau hmunah thisen bua hmuh a ni a, a sirah hnang hlaina hmuh niin, savawm hi kah a nih rinna lian tak neih a ni. Hemi zan vek hian staff-te chuan thisen an hmuhna lai ram hi kalkhan hrang hrangah changin tlaivarin an hual a, staff thenkhatin a chhungah luhchilhin an dap chhuak vek a ni. A sa emaw a sa channa ni awm emaw engmah hnuhma hmuh a ni loa, mihring rinhlelh tur pawh tumah man chhuah an ni lo. Hemi chungchangah hian Sairang Police Station-ah FIR thehluh a ni tho a ni.
Thisen hmuh hi MZU Bio-tech Laboratory-a finfiah tura pek a ni a, maua thisen kai hi mihring kut atanga kai ni thei a ni a, hei vang hian Forensic Science Laboratory lamah fingerprint analysis tih nghal a ni bawk.
Savawm hnu hi Forest staff-ten ngawrh takin an la chhui zel a, DNA test result nghah mek hi a result azirin hmalak dan tur rel thar leh tum a ni. Zoo atanga savawm chhuak hi a thawm emaw hmu emaw kan awm chuan a rang lama Forest department hriattir turin mipui an ngen nawn a. Wildlife (Protection) Act 1972 hnuaiah savawm hi Schedule-I ah dah an nih angin, a lo kap emaw a sa chan emaw kan awm a nih chuan an chungah dan anga hma lak a ni dawn tih mipui an inhriattir a. WPA 1972 Section 51-in a sawi angin, lo tihlum emaw a sa lo chan emaw an awm chuan kum 3 atanga kum 7 thleng lung in tan theihna a ni tih a sawi a ni.
He savawm hmu emaw a chanchin hria emaw chuan, phone number – 8974436843/ 9612077436/ 9862347339/ 8974450937 khawi emaw berah hian a rang thei ang bera hriattir turin Aizawl Zoological Park director chuan mipui a ngen a ni.
Savawm tlanbo la chhui zel Kah a nih leh loh finfiah tum
