Sorkarin provincialise tura a lo tih tawh, chumi sut a nih vanga lungawi lo, provincialise leh phuta a huhova chawlh la MizoramGovt. Adhoc-Aided High School Teachers’ Association (MIGAHTA) te’n chawlh an la chhunzawm zel.
“Mizoram Govt. Adhoc-Aided High School Teachers Association (MIGAHTA) chuan school provincialised kan nih tawhna dinhmuna dah let leh kan phutna leh dinhmun hniam zawka dah duh lohna entira sorkar laka kan lungawi lohna chu ‘Mass casual Leave’ lain, vawiin Dt.28.07.2026 (Thawhlehni) hian kan chhunzawm leh,” tiin Thawhlehni khan thuchhuah an siam.
“Adhoc High School-te hi Adhoc status-a kum 15 kan awm hnuah, kum 2023-ah sorkarin min provincialise vek tawh a, Govt. signboard leh seal pawh siamtir vek kan ni. Nimahsela thla 9 hnuah revoke leh vek kan ni a. Revoke kan nih hnu hian provincialise leh vek kan nih tur thu minister tawngka vawi tam tak kan dawng a, amaherawhchu, revoke kan nih atanga kum 2 a liam hnuah kum 20 kal taa kan awm tawhna leh kan kalsan tawh dinhmun, Lumpsum-Grant-in Aid dinhmunah dah kan nih lehna tur Rules sorkarin a chhuah leh ta a ni. Hetianga provincialise kan nih tawhna min hlih sak mai bakah kan school dinhmun a hma aia hniam zawka dah a ni hi pawi kan ti tak zet a. Hetianga school dinhmun dah hniam a nih avang hian tuna thawk mekte kan retire hunah kan aiawh tur zirtirtu chu hlawh tlemte hmanga lak an ni tawh tur hi zirtirtu dinhmun dahhniamnaah kan ngai a, thalai lehkhathiam, hna zawng mekte beidawnna siamtu a ni tur hi kan duh lo a, kan dodal zel dawn a ni,” an ti bawk.
July ni 21 leh ni 22 khan badge dum an lo bel tawh a, July ni 23 leh ni 24 khan No Teaching Day hmangin lungawi lohna an lantir leh. July ni 27 leh ni 28-ah Mizoram puma adhoc high school 90 chuanga thawkte’n mass casual leave lain a huhovin an chawl a, sikul khar a ni. Nilaini hian Vanapa Hall kawta punkhawm an tum bawk.
Sawhthing leina atana central tumsak nuai 900 chuang inhlan
