Sawhthing leina turah inrem
Metric tonne 10 sawhthing leina turah sawrkar aiawh leh a hralhtu tur bakah a leitu tur company chuan Thawhtanni khan Aizawlah inremna thuthlung an ziak.
Rural Development department hnuaia Mizoram State Rural Livelihoods Mission (MzSRLM) leh Reliance Retail Limited chuan kumin January khan thawhhona thuthlung (MoU) an lo ziak tawh a, hemi bawhzuina kalzelah sawhthing hralhna tur, ‘purchase order’ chu Thawhtanni khan Chief Minister Office-ah inhlan a. Ropuiliani Women Farmer Producer Company Limited, MzSRLM chuan sawhthing metric ton 10 chu Reliance Retail Ltd hnenah an hralh dawn a ni.
Order inhlannaah hian chief minister Lalduhoma chuan, sawrkar flagship programme hnuaia thlai ngaihpawimawh tak sawhthing, Mizoram pawna hralh chhuah thei a ni chu lawmawm a tih thu a sawi a. He hmalakna kaltlang hian Mizoram tharchhuah sawhthing chu Reliance Retail Ltd-in an lei dawn tih a sawi a ni.
Order inhlannaah hian sawrkar lam aiawhin Agriculture minister PC Vanlalruata, Rural Development minister Prof. Lalnilawma, adviser to chief minister (Handholding Policy) Dr KC Lalmalsawmzauva, OSD to chief minister Jonathan Lalremruata bakah MzSRLM leh Ropuiliani Women Farmer Producer Company Ltd aiawhte an tel a. Reliance Retail Ltd aiawhin East India Regional Head VP Raj Banerjee leh North East Zone Business Head AVP Boudhayan Biswas te an tel a ni.
Sawhthing leina turah inrem
