Sawrkarin sawhthing leina atan a chingtute hnenah cheng vaibelchhe 95 a pechhuak tawh a, la pek loh cheng vbch. 45 vel a awm. Chief minister Lalduhoma chuan sawhthing man la pek zawh loh chhan hi thil dik lo ti an awm vang niin a sawi a. Thlai thlan bik chauh ni lo, thildangah pawh an sawrkar chuan D-A-H chu an kalpui zel dawn tih a sawi.
Ningania Assembly Session-ah chief minister Lalduhoma chuan, sawrkarin kuthnathawktute hnena sawhthing a leina man a la pek vek loh chhan chu pawisa an neih loh vang a ni loa, a dawngtu tur zingah thil dik lo ti an awm a, social audit hmangin an enfiah a, a fel chin chu an pe zel tih a sawi.
Bana Kaih Scheme atana sum an dah chu an la hmang seng loa, hmanna tur bik ruahman sa loin a tul dan anga hman a ni a, sawhthing leh thlai thlan bik chauh niloin, entrepreuer leh innovator tan pawh an ‘DAH’ vek a, rubber leh khuaikhawi kalkawp tirna tur thlengin an ‘DAH’ zel dawn tih a sawi.
House-a zawhna Agriculture & Farmer’s Welfare minister Pc Vanlalruata chhan danin, kumin February 20 leh June 30 inkar khan sawrkarin sawhthing a lei a. August 16 thlenga report khaikhawmah quintal 3,45,932 an lei. August 28 thleng khan sawhthing leina (support price) atan cheng vaibelchhe 95.63 an seng tawh a. Pek chhuah mai tur pawh an nei.
Sawhthing leikhawm hi auction notice tihchhuaha a chhang sang apiang hnenah hralhchhuah lehnghal zel a ni a. Sawrkarin sawhthing a hralhna atana sum a hmuhlet hi tun dinhmunah cheng vbch. 12.78 a ni.
Member-te zawhna a chhannaah minister chuan, ZPM sawrkarin thlai thlan bik leina atana cheng vbch.110 a dah atangin sawhthing leina atan vbch. 95 chuang an seng tawh a, vbch.45 pek tur (ba) an la neih hi Bana Kaih Scheme-a sum dah atangin an pe dawn tih a sawi a ni.
Sawhthing manah vbch.95 pe tawh Thildangah pawh kan DAH zel ang:- Chief minister
