Sawhthing neitu mangang an lawm

FApril ni 21-ah Mizoram sorkarin sawhthing a lei leh \an a, sawhthing neitute an lawm; an mangan em vanga lawm an nih thu an sawi. Sawhthing hi primarcy collection centre ni lo khuaah chuan kg-ah Rs 50 aia tlawmin an lei a, an sawhthing a lo vuai hman bawk. A vuai zel ang a, a chhe nasa telh telh ang tih an hlau a, chuvangin a man a tlawm a nih pawhinhralh hrim hrim an mamawh avangin an lawm tih an sawi a ni.
Mizoram sorkarin February ni 20 atanga March ni 20 thlenga a lei hnuah April ni 21-ah a lei tan leh a, April ni 21 hma hian Mizoram hmun hrang hrangah chhungkaw engemaw zatin a hralh hun nghakin sawhthing chawh sa an lo kawl. An chawhna a rei tawh avangin a lo vuai hman a, a chhe nasa hman bawk.
Maite khuaah chuan kg-ah Rs 47-in an hralh a, an tha sen leh a hmun atanga man chawia an phurh man te chhutin a man hi tlawm an ti. An chawh sa a lo chhe hman bawk.
Maite pa pakhat chuan, “Bag 50 kan dah a, an rawn lei meuh chuan bag 38 chauh a lo ni tawh a, a vuai nasa a, a uiawm khawp mai,” a ti. Chawh sa bag 70 nei, an hralh meuh chuan kg 50 lo ni tawh a awm a, bag 450 nei, bag 350 vel ni tawh tura ngaih te pawh an awm.
“Kan hralh loh chuan a vuai zel ang a, a zang telh telh ang a, a chhe nasa telh telh bawk ang a. Chuvangin a rate hi chu eng zat pawh ni se hralh hi kan duh a ni tawp mai. Kan mangang em a, sorkarin Rs 47-a a rawn lei pawh hi lawm lo thei kan ni lo,” Maite pa pakhat chuan a ti.
An sawi danin, sorkar inrawlh hmain nikumah khan kg-ah Rs 70-in sawhthing hi an hralh a, kum hmasaah Rs 120-in an hralh. Sawhthing hi an hlawkpui a, in 250 khuaah in 240 velin a hmun an nei. Kumina bag 600 nei hian nikum ang kha ni se cheng nuai 16 vel an lei thei dawn a, kum hmasa ang kha ni se cheng nuai 30 chuang an lei ang tiin an chhut. Kuminah chuan bag 600 neiin cheng nuai nga an lei an beisei lo tih an sawi. Bag khatah hian kg 40 vel a awm an ti.
“Tunah hian Rs 50 emaw, chu aia to emawin hralh ta ila, sawhthing kan dah chhiat hnem avangin sawhthing kan chan teuh tawh,” pa pakhat chuan a ti a, “Tuna kan dinhmunah chuan hralh hrim hrim kan duh a ni mai,” a ti bawk.