Sawhthingah ‘Mizo brand’ siam dawn
India ram state dang leh ram dangin Mizorama sawhthing thar an hriathran theihnan ‘Mizo brand’ siam a ni dawn tih adviser to chief minister (Hand Holding) Dr KC Lalmalsawmzauva chuan a sawi.
Mizoram Agriculture Marketing Board-in sawhthing sawngbawl tur bika sawrkar hriatpui firm leh mimal a thlanchhuah 13 tan Thawhlehni khan Ginger Processing Centre CDAR, Tuirialah training buatsaih a ni a. Hmanpuitu adviser to CM hian Mizoram sawhthing thar chu state dang leh ram dangah an hriat theihnan ‘Mizo brand’ siam a ni dawn a, a packaging material-ah MAMB logo telh zel an duh tih a sawi. “Hei vang hian Mizo sawhthing thar chu a tha bik tur a ni a, belhchian a dawl tur a ni,” a ti.
Sawrkar flagship programme tihhlawhtlin kawngah pass mark an hmu niin a sawi. “Kan thlai thlan bik 5 zingah hmarcha chu sawrkar buaipui ngai loin loneituten an hralh zo thei a, Mizo buh kan lei tawh a, aieng quintal 400 kan lei a, kan lei belh mek. Hmunphiah pawh harsatna tlem tawk deuh mah ila, support price period chhunga thar chu kan lei zo thawkhat tawh. Sawhthingah duhthusam angin kal thei chiah lo mah ila, tunah hian quintal 114622.82 kan lei tawh a, Mizoram history kan siam a ni,” Dr KC Lalmalsawmzauva hian a ti.
Training-ah hian SAMETI faculty Vanlalramchhani Chhangte chuan sawhthing zai lep leh a tih ro dan a zirtir a; Brightflame Food & Agriculture atangin sawhthing ro hralh dan kalphung zirtirin CDAR neitu Lalawmpuii’n practical training a pe a ni.
Adviser to CM hi Delhi leh Jharkhand atanga sawhthing sawngbawl lam timi company lokalte nen an inkawm zui a. Mizorama Ginger Processing Plant din dan tur leh kuthnathawktute dawm kanna tur central policy an sawiho a ni
Sawhthingah ‘Mizo brand’ siam dawn
