Daily Newspaper

‘SAWI FIAHNA’ LEH ‘HRILH FIAHNA’

170

-PC Thangzikpuia

Mizo tawnga transitive verb thumal indicative mood form zingah hian object pakhat chauh nei chi leh object pahnih nei chi an awm a. Hei hi kan lo la bih chian ngai loh vàng em maw ni, object pakhat nei chi ‘sawi’ leh amah sawi fiahtu adverb ‘fiah’ inkawp, ‘sawi fiah’ tih chelek ngei ngeina tur tawngkamah te pawh hian object pahnih nei chi ‘hrilh’ leh adverb ‘fiah’ inkawp, ‘hrilh fiah’ tih chelek tâk tlat zâwkna thu leh hla hi hmuh tur a tam hle. Hei vang hian kan lehkhabu zahawm tham chin bu hming te meuh pawh hi, ‘Sawi Fiahna’ bu ni zâwk àwm tak te hi ‘Hrilh Fiahna’ bu te a nih phah ta rim rem mai thin a; thenkhat phei chuan transitive verb leh adverb tang dun, nihna hran nei ve ve ni si hi suffix a rawn beh pawhin leh, lehkhabu hming a nih pawha compounded verbal noun ‘sawi fiahna/hrilh fiahna’ tih ni ngei ngei tur si hi, ‘sawifiahna/hrilhfiahna’ ti tein kan ziah zawm (ziak zawm—ni lovin!) palh nawk nawk thin bawk a ni.

Sawi:— He thumal hi transitive verb thumal niin, a indicative mood form hi object pakhat chauh nei chi a ni a. “Biaka’n dâwt a sawi,” ti ta ila, heta thil tih sawi nâna kan hman transitive verb thumal indicative mood form ‘sawi’ hi lo tuartu (object) pakhat chauh a awm tih kan hmu a; chu a object chu ‘dâwt’ tih hi a ni. Hetah hian Biaka thil tih leh a object kan sawi, ‘dawt a sawi’ tih hi lo tuar (lo dawng) chhâwng ve lehtu (indirect object) a awm miah lo a, “Biaka’n dawt a sawi,” tia kan sawi hian Biaka thil tih kan sawi hi a kimchang der tawh a ni.

Hetiang hian transitive verb thumal indicative mood form zingah hian object pakhat (direct object) chauh nei chi thumal ‘sawi’ hi chu thil tih lo dawng/lo tuar chhâwng ve lehtu (indirect object) sawi lan tel ngai lo chi tawngkamah te hman chi a ni ta a. Thu Puan (Thupuan—ni suh e!) bu chhûnga thu ril inthup te, Mizo tawnga tawng un te, hla thu awmzia te hi ‘hrilh’ bîk nei kher lo pawha a sawia ‘sawi fiah’ mawlh mawlh theih a ni a; chutianga kan ‘sawi fiahna’ chu a bu te pawha sìam theih a ni ta bawk a ni.

Hrilh:— Hei ve thung erawh hi chu transitive verb thumal zingah, a indicative mood form hi object pahnih—direct object leh indirect object nei chi thumal a ni ve thung a. “Biaka’n dâwt a hrilh,” tiin sawi ve ta ringawt ila, heta Biaka thil tih kan sawina ‘hrilh’ leh a direct object ‘dâwt’ hi lo tuar/lo dawng chhâwng ve lehtu (indirect object) kan sawi lan tel si loh chuan, Biaka hian tu chu nge dâwt a hrilh tih hi hriat theih a ni ta lo a. Chuvangin, ‘hrilh’ hi chu a indirect object tel lo chuan thil tih sawina tawngkam kimchang a ni ve thin ta lo a ni.

Hetiang hi a nih avangin, transitive verb thumal indicative mood form rau rauah ‘hrilh’ hi chu direct object bâkah, indirect object sawi lan telna tawngkamah te hman chi bîk thumal a ni ta a. Thu Puan bu chhûnga thu ril inthup te, Mizo tawnga tawng un kan neih te, hla thu awmzia te hi a sawia ‘sawi’ ringawt lo deuhin, a lo ngaithlatu kha a hrilhin kan ‘hrilh fiah’ ta thin a. Hetianga kan thu sawi lo ngaithlatu (indirect object) langa thu kan chheh famkimnaah hian, tu emaw-ina eng thil emaw mi dang a ‘hrilh fiahna’ ang chi hi a awm ta bîk thin a ni.
1) Denga’n Pathian thu a sawi.
2) Denga’n Pathian thu a hrilh.

He entirna sentence kan tàr lanah hian, ‘sawi’ hi chuan lo dawngsawngtu (indirect object) a mamawh kher kher lo a; indirect object tel lova direct object nen chauha kan sawi hian Denga thil tih kan sawi hi a kimchang der mai a ni. Amaherawhchu, kan sentence pahnihnaa ‘hrilh’ ve thung erawh hi chu lo dawngsawngtu (indirect object) sawi lan tel loh chuan Denga thil tih kan sawi hi a kimchang pha ve ta hauh lo a; chuvangin, ‘hrilh’ hmanga thil tih kan sawinaah hi chuan direct object bâkah indirect object sawi lan tel hi a ngai ta bîk thin a ni.

Tichuan, hêng transitive verb thumal pahnihte hi adverb atâna kan hman ‘fiah’-in a rawn sawi fiahna (sawifiahna—ni lovin!)-ah chuan, ‘sawi fiah’ tiin leh ‘hrilh fiah’ tiin kan sawi thin a. Heta adverb thumal ‘fiah’-ah hian suffix ‘na’ hi a rawn beh chuan compounded verbal noun, ‘sawi fiahna/hrilh fiahna’ tih a lo ni ta thin a. Hetah hian transitive verb thumal ve ve ni mah sela, ‘sawi’ leh ‘hrilh’ hi anmahni ngâwka kan hmannaah a ni emaw, adverb ‘fiah’-in a rawn sawi fiahnaah a ni emaw, suffix ‘na’ a rawn behnaah emaw pawh ni sela, tawngkam awmze inang lo daih an nih avangin, kan thu leh hla tam taka ‘sawi fiah’ leh ‘sawi fiahna’ tih chelek ngei ngeina tur zâwk nia langah te, ‘hrilh fiah’ leh ‘hrilh fiahna’ tih kan chelek palh nawk nawk zâwk thin hi chu a dik hlel deuh thin niin a lang.

Tun hnaiah pawh hian social media lamah chuan mi tute emaw ni chuan ‘hrilhfiahna’ tia ziah zawm leh, ‘hrilh fiahna’ tia ziah zawm loh hi awmze inang lo angin leh, object an neih dan pawh inang lo ang tea sawi luih an rawn tum a ni àwm e. Mizo tawng grammar kal phung dik hnuchhawn chunga mahni ngaih dan (ngaihdan—ni lovin!) mila Mizo tawng hi her rem luih mai mai kan tum zel dâwn a nih ngai chuan, adverb atâna kan hman ‘fiah’ leh transitive verb thumal dang inkawp rêng rêng pawh ziah dân chi hnih kan neihtir a ngai ve vek dâwn tihna a ni ang a, ‘sawifiah’ leh ‘sawi fiah’ te, ‘hmufiah’ leh ‘hmu fiah’ te, ‘enfiah’ leh ‘en fiah’ te, ‘lamfiah’ leh ‘lam fiah’ te, ‘ziakfiah’ leh ‘ziak fiah’ te, ‘zùlfiah’ leh ‘zùl fiah’ te pawh ziah dân chi hnih kan neihtir a ngai thar ve leh hnuhnawh vek ang a; Mizo tawng grammar kal phung dik awm fel sa ham pherh chhe zâwng bawkin chêt kan thawh a ni ringawt mai dâwn a ni.

Nimahsela, chutiang chuan ni lul lo ve! ‘Fiah’ tih thumal hian kan sentence-a main verb a rawn phusakpui tawh rêng rêng chuan, thil tih sawi fiahtu ‘adverb’ a rawn ni chat thin a. Chûngah chuan a kawppui ‘verb’ rawn sawi fiahtu ‘adverb’ a nih tlat avangin, adverb rêng rêng chu a sawi fiah verb thumal nen khân grammar dânah ziah zawm tur a ni ngai lo a. Chuvangin, adverb atâna kan hman ‘fiah’-ah hian suffix ‘na’ a rawn beh pawhin, compounded verbal noun a niha ‘sawi fiahna, hrilh fiahna…adt.’ tia a inzawm lova ziah hi a dik ta a. Hei hi title case atân tea kan hmannaah pawh ziah zawm lohin, thumal bul hawrawp hi hawrawppuia ziakin, ‘Sawi Fiahna, Hrilh Fiahna…adt.’ tia ziah hi a dik ta zel zâwk a ni.

Tichuan, “Rev. Vanlalawia’n chhìar-kawp chawh dan a hrilh fiah,” tia kan sawi rikngawt hi chuan, “Tu maw a hrilh fiaht” tia a indirect object kan lo zawh lêt a ngai thin a; amaherawhchu, “…a sawi fiah,” kan tih erawh hi chuan, heta verb leh adverb ‘sawi fiah’-ah hi chuan indirect object phût chhuah tur a awm ve miah loh a; chuvangin, “Tu maw a sawi fiaht” tia tawngkam ing-euh fê nena a indirect object lo zawh lêt dâw dâw chi a ni ve ta lo a ni. Hetianga miin eng thu emaw, a hrilha ‘hrilh’ bîk nei kher lo a, a sawia an ‘sawi fiahna’ leh, tu emaw hrilh bîk nei a, a hrilha an ‘hrilh fiahna’ hi tawngkam awmze inang lo daih an nih avang hian, kan tawngkamah hian an chêt tlatna tur hmun dik hi a awm hrang fel dun êm êm tihna a ni ta a ni.

Thu Puan Hrilh Fiahna’ bu âia ‘Thu Puan Sawi Fiahna’ zâwk te, ‘tawng Un Hrilh Fiahna’ âia ‘tawng Un Sawi Fiahna’ te, ‘Hla Thu Hrilh Fiahna’ âia ‘Hla Thu Sawi Fiahna’ bu zâwk te kan neih ve hun tur chu—chhuan thar Mizo tawng grammar kal phung hmu fiah (hmufiah—ni lo ve!)-tute khawvelah chuan a la rawn inher chhuak ngei ang.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy