Mizoram Government Adhoc Aided School Teachers Union (MIGASTU) chuan tunhnaia Council of Minister-in an member school 180 te sawrkar school-a a hlankai (provincialised) lawmna inkhawmpui lian chu Ningani khan Aizawlah a buatsaih.
He hun hmanpuitu chief minister Zoramthanga chuan zirna leh hriselna hi nitina kan mamawh mitin nghawng a ni, tiin, sum harsatna karah sawrkar chuan a pahnih tan hian theihtawp a chhuah reng thin tih a sawi a. Education minister leh department-in ruahmanna tha tak siamin, sawrkar zawh tawk tur ngaihtuah chungin he hmalakna hi an tihlawhtling thei tih a sawi.
Sawrkar school-a heti zat hlankai chu sum tam tak a mamawh tel avangin mi thenkhatin a taka an kalpui theih ring lo mah se, Pathian leh mipui zarah sawrkarna an chelh leh a nih chuan, tha taka an kalpui theih an inring tih sawiin, “Sawrkarin sum hnar tha zawk a neih theih nan Resource Mobilization department kan siam thar a, tangkai takin kan hmang dawn a ni,” a ti.
Hmanpuitu dang School Education minister Lalchhandama Ralte chuan provincialised tur hian rules hautak leh kawng thui em em siam hmasak a ngai a. Chu rules chu September 24 khan peihfel niin, September 27 khan Council of Minister chuan a pass a; September 28-ah Ministry of Education dawrin Delhi a kal nghal a, hlankai an nih anga hamthatna an dawn theihna tur a zu tifel a, September 29 khan sawrkar school-a dah an nihna notification an tichhuak nghal tih a sawi a ni.
“In duhthusam dinhmuna kan hlankai chhan che u chu, sawrkarin zirna a ngaihpawimawh vang a ni. In thawhna hmun theuha zirna tha tak pe a, a huna school kal a, dar bikima hna thawk a, zahawm taka invawng turin kan beisei che u ni,” a ti.
School Education director Lalsangliana sawi danin, provincialised hmu school 180 kaltlang hian chawp leh chilhin chhungkaw 1422 chuan hlawkna an tel nghal a, school dang dinhmun tha zawka hlankai nena belhkhawm chuan chhungkaw 2748-in hlawkna an tel.
Sawkar school-a hlankai nih an lawm
