Mizoram sawrkarin Synod hnena a hlanchhawn tur ruihhlo enkawlna hmun Jordan Center dinhmun hrechiang turin Social Welfare department hotute leh Mizoram Synod hotuten Thawhtanni khan an enho.
Social Welfare Department hi joint secretary Zonunthari hoin official 5 an kal a, Mizoram Synod hi moderator Rev John Raldosanga bakah Synod Social Front atangin Rev K. Lallawmzuala, executive secretary Rev P Zohmangaiha, secretary Rev. Lalrinmawia leh member dang pathum an kal a ni.
Jordan Center hi Mizoram sawrkar chuan Synod enkawl turin kum 15 atan inremna a ziahpui a. A hmunhma, building leh a chhung bungrua awm hi a nih ang anga inpek turin an lo inrem tawh a ni.
Jordan Center-ah hian chhungkaw 30 vel awm theihna quarters building 9, office building, damdawi in bakah hmeichhia leh mipa ruihhlo ngai enkawlna hmun a hrang ve ve fencing tha tak nen a awm. Sawrkar laipui Ministry of Social Justice & Empowerment norms leh guidelines anga din a nih avangin building hrang hrang – counselling, detox, recreation, dorm, chapel adt. a awm a ni. Bungrua a awm tha hle bawk a, training equipments tamtak a awm sa.
Building hi lian vak lo, a hrang hrang a nih avangin tun dinhmunah mi 70-100 bak an leng loa, A vaiin building inhlanchhawn tur hi 40 a ni. Thawmthat ngai leh thil mamawh belh enho nghal a ni a. Synod hian June thla Synod Executive Committee ah an kalpui dan tur hi an rel fel dawn a ni.
Sawrkar aiawh leh Synod-in Jordan Center dinhmun enho
