Kalphung thar mipui sawrkar chu huai takin, sawrkar hmasa tih ngam loh tiin ram tan a kal zel dawn tih ZPM chuan an sawi.
ZPM Gen. Hqrs. thuchhuak chuan, chief minister Pu Lalduhoma kaihhruai sawrkar chu mipuiin thuneihna an pek tirh phat atangin huaisen takin Zoram hmasawn nan hma a la zel a, Assembly Session leh MP inthlanten hnathawhna hun tam tak la hek mah se, chhunzan zawmin minister leh MLA ten hna an thawk a, kalphung hluia hun rei tak Mizoram hruai chul tawhtute mit a kham hle tih a sawi
Sawrkar tharin huaisen taka hma a lak chu eptu party-ten thu tling lo leh belhchian dawl lo hmangin chhaih buai an tum nasa hle tiin, ‘Sawrkar thar chuan huaisen takin buhfai man a siamtha a, hengte hi thenkhat chuan mipui tawrhna thlen tur angin thu an thehdarh a, a pawi hle. Supply minister thuchhuak kha ngun taka kan ngaihven a tul a, mipui that tlanna turin sawrkarin ngaihtuahna a seng a ni,’ a ti. Tuialhthei man pawh kutdawh rilru pu loa kan ram hmakhua thlir chunga mipuiin sawrkar hmalakna thlawp a pawimawh tih a sawi.
CBI thuneihna pek chungchangah youtuber pakhatin thuchiang hre lo leh India ram puma hman tur criminal law thar – Bhraratya Nyaya Sanhita 2023 zirchiang loin Mizoram sawrkarin CBI koh luh sut leh ta anga mipui hmuh theiha video a siam chu Vigilance department-in thudik hmangin a rawn hrilhfiah tih a sawi a ni.
Casual teacher lak danah sawrkarin fak a hlawh hle a, chutih rualin posting chungchangah siamrem ngai a awm avangin siamrem leh mek a ni a, hemi chhung lek pawh hian thenkhatin School Education department chirhthehna tur an zawng leh hman tih ZPM hian sawiin, ‘Casual teacher tura lakte hi sawrkar hian a duhna leh mamawhna hmun apianga dah tura lak an ni a, hemi hresa leh huam hian hna zawng laite pawhin hna an dil a ni,’ a ti.
Councillor, corporator leh Board chairman ho lawmman siamthat chu ngun taka ngaihtuah tul tih sawiin, hna tak tak thawk tura kan beisei chuan an mamawh zualpui phuhru tur tal lawmman siamsak chu thil tih makmawh tih a sawi. Lawmman ennawn sak chu mi tam an ni loa, mipui tana hna chak zawka an thawh theihna tura an tha tihchakna, mipui tan vek a ni tih hriatthiam a tul hle tih a sawi a ni.
Mipuiin beiseina sang tak nena an thlir sawrkar tharin hna a thawh mek laia eptute beihna leh sawiselna chu sawrkar khalhngil tumna lam aiin politics-a mipui rilru kawih her tumna nia a lan thu ZPM hian a sawi bawk.
Sawrkar hmasa tih ngam lohte tiin ram tan ZPM kal zel tum
