Kan school building leh hmanrua en in, sawrkar hmasate enkawlna hnuaiah khan zirna in ngaihpawimawh a hlawh tawk lo tih a langchiang hlea a hriat thu ZPM sawrkara Education consultant Rev Dr K Thanzauva chuan a sawi.
Thawhtannia ZPM party office-a inkhawmah ZPM hruaitu Rev Dr K Thanzauva chuan, India-in zalenna a hmuh hnu ah zirnaa hma sawn tuma India sawrkarin hma a lakna a sawi a. Mizoramah pawh retheihna in rualkhai taka min hrut lai chuan zirtirtuten thahnemngai takin thingtlang leh khawpuiah zirna an kalpui thin a, school building leh hmanraw neih pawh a la inang tlang viau tih a sawi.
Hetihlai hian central service-ah Mizo thalai thahnem tak an inziaktling thei a, zirnaah hma kan sawnin a hlawhtlinna pawh nasa taka hmuh a ni tih a sawi. UT kan nih hnu leh state puitling kan nih hnu in, ram hruaitu hmasaten a lawmna hun (honey moon) an hmang rei ta lutuk a, kan ram zirna hmasawn mek pawh chuan thuanawp lam a pan ta nia a lan thu a sawi bawk.
“Vawiina kan school building leh hmanrua en hian, sawrkar hmasate enkawlna hnuaiah khan zirna hian ngaihpawimawh a hlawh tawk lo tih a langchiang hle in ka hria. Mimal in leh biak in tha tak tak kan neih theih laiin, kan school building erawh a tha lo hlawm em em a, a thlawna zirna kan kalpuina school-ah zirlai hlawhtling an chhuak hleithei ta meuh lo. Private school sum leh pai tam tak kan sen thinna atangte in zirlai tha an lo chhuak leh fo thin,” Education consultant hian a ti.
Thingtlang kilkhawr thlenga zirna kalpui dan leh zirna in enkawl dan chu ennawn a ngai ta hle tih a sawi a. Sawrkar school ah mi harsa berte thlengin kan lut khawm a, zirtirtu tha tak tan pawh zirtirna tha kalpui hleihtheih loh khawpin kan zirna in leh hmanrua a awngrawp hle, tiin, “Khawvel changkang zel mila kalpui hleihtheih loh zirna in mumal lo, a bikin thingtlang lamah a tam hle a. Zirtirtu tang viau mah se, zirlaibu ringawt a lo tawk tawh loa, hmanraw thate nena thuam chak an nih si loh chuan harsa chin a awm tawh thin a ni,” a ti
Zirlaite chu Mizo leh English chauh niloin Hindi thiam tura zirtir an hun hle tawh tih a sawi a. Politician-te tan leh sumdawnna lam kalpui turte tan pawh tawng thiam a pawimawh em em tih a sawi a ni.
Kan rama ruihhlo a hluar em em chhan pawh chu zirna kan ngaihpawimawh tawk loh vang a ni thei tih Rev Dr K Thanzauva hian a sawi. “Thalai tam tak zirna bansan, tih tur mumal hre lo kan pung zel a, chu’ngte chu ruihhloin a man awlsam hle tawh thin,” a ti.
Sawrkar hmasate hnuaiah zirna in ngaihpawimawh a hlawh tawk lo – Rev Dr K Thanzauva
