Sawrkar hnathawk aikal la 3365 Restricted tender 2 kan pe – CM

Sawrkar hnathawk aikal la hriat theih chin chu mi 3365 an ni a, School Education department-ah an tam ber. Sawrkar tharah restricted tender pahnih an pe tawh a, pek loh theih loh thil a ni tih chief minister Lalduhoma chuan a sawi.Zirtawpnia Assembly thutkhawmah House leader Lalduhoma chuan sawrkar hnathawk aikal la zat hriat an duh avangin sawrkarin department tin a zawtkual tih a sawi a. Aikal la ten an chhan danin, hrisel lohna kaihhnawihah mi 2070 an awm a, inchhungkhur harsatna nei 703, mimal harsatna dang – in luah tur hmu zo lo emaw a panna kawng chhiat lutuk avanga lirtheia thlen zawh loh leh an awmna tur hmuna awmte tawng an thiam loh avanga aikal la 350 an awm. Chhuanlam tur nei lem lo mi 90 an awm a, thuneitu sang zawkin an tih avanga lak 35, zirna sang zawng tih duh vanga aikal la 43 leh chhan dang nei 74 an awm a, an vaiin 3365 an ni tih a sawi.
Aikal lak tam zualna department chu – School Education-ah 1115, Health & Family Welfare-ah 624, Power & Electricity-ah 253 an ni.
“A chinchang kan han hre phawt anga, cabinet-in tul a tih angin a la ngaihtuah ang. Aikal thenkhat chu a thawktu tak aiin an tha zawk tihte sawi a awm a. Thawk tlak ngang lo chu compulsory-a chawlh tir mai tur em ni dawn, tihte ngaihtuah a ni anga, natna khirhkhan bik, cancer vei mekte erawh an awm,” a ti.
Restricted tender chu pek loh tawp tur an ti loa, chief minister remtihna lo chuan pek loh tur an ti a, a lo fuh lo a nih chuan amahin mawh a phur dawn tih a sawi. An sawrkar chhunga thil dik lo leh fel lo zawng zawngah mawh a phur ngam a, a phur dawn bawk tih a sawi a ni.
Loh theih lohin restricted tender hi pahnih khat an ti tawh a, pakhat chu Sakawrtuichhun atanga Aizawl Zoo kawng a ni tih Lalduhoma hian a sawi. Aizawl West-I a bial tirhin he kawng hi a la pawp loa, theihtawpin MLA fund nen tangkawpin an ti pawp a, bialtu MLA a nih loh hnu ah he kawng hi a chhe deuh vek a, a bial leh hnu ah a tha leh tih a sawi a ni.
He kawng hi a pawimawh a, airport kawng pakhat zawk a nih laiin, sawrkar hmasa hunah an khawih chin a nep deuh a, fur thlenaa a tlang loh an hlauh avangin restricted-a hna thawh tlak nia ngaiin an pe tih a sawi. Hei lo hi, INGC-in oil leh gas lakchhuahna kawnga an tana kawng pawimawh leh hmanhmawh thlak ni bawk Chhimluangte lei siam zawh thuai nan restricted-in an pe tih a sawi.