Inthlan chu kuthnathawktute mai niloin sawrkar hnathawkten an nghakhlel a, a hun taka hlawh pe thei tur sawrkar thar hmel hmuh an chak tawh tih ZPM working president K Sapdanga chuan a sawi.
Hrangturzo bial khaaw thenkhat a tlawhnaa an party hruaitute nen an inkawmnaah ZPM working president chuan inthlan chu kuthnathawktute chauhin an nghakhlel loa, sawrkar hnathawkten sawrkar thar hmel hmuh an chak thu an sawi hreh tawh lo tih sawiin, “A hun taka hlawh pe thei tur sawrkar thar hmel hmuh an chak a ni,” a ti.
Thalaite, a bikin mipate ruihhloin a tibuai nasa a, zu avanga thi pawh an tam tih a sawi a. Hei hi a chhan chu sawrkar inrelbawlna mumal loh vang nia sawiin, “Danin awmzia a nei lo a. Hei vang hian nuho ten politics an ngaihven phah a, ram tha zawk an beisei a, an tu leh fate tan ram tha siam an duh avangin politics-ah an zuanglut a ni,” K Sapdanga hian a ti.
Kuthnathawktute chawikan chu an hna hmasa tur a nih thu leh thalaite chawikan pawh an ngaihpawimawh thu a sawi.Kuthnathawktute chawikan chu kalphung thar a ni nghal mai tih sawiin, thlai thar lei chuan kuthnathawktute chauha chawikang dawn lo a, bazar-a thil zuar, taxi leh dawrkaiten a zar kan zo vek dawn tih a sawi.
“Kan ram chhanchhuak turin kan hotupa ber, chief minister candidate-in hma a hruai a, eiru lo turin kan intiam a ni. Campaign-naah pawh sum leh pai kan hmachhuan ve lo, a neih pawh kan nei ve lo,” ZPM hruaitu hian a ti.
Sawrkar hnathawkten a hun taka hlawh pe thei tur an duh – ZPM working president
