Sawrkar inrawlh tam lutuk vangin thlai thar hralhchhuah buai phah – Zodintluanga

Sawrkar inrawlh tam
lutuk vangin thlai thar
hralhchhuah buai phah
– Zodintluanga
Thangthat lak tum luat avanga thlaithar hralhchhuah kawnga ZPM sawrkar a inrawlh tam lutuk luatah kuthnathawktuten harsatna an tawk mek niin Congress hruaitu Zodintluanga chuan a sawi.
Central Young Chakma Association annual conference vawi 45-na Marpara South-a neih a hmanpui hnua Marpara-a loneitute a kawmnaah All India Adivasi Congress Committee (AIACC) national executive member Zodintluanga chuan khawthlang lam chuan hmunphiah an ching nasa hle a, tunhma zawngin a hralhchhuahna lamah harsatna an tawk ngai loa, an lo tih thin dan angin tluang takin an hralh mai thin a, nikuma sawrkar a rawn inrawlh hnu ah hmunphiah hralh a buai nghal niin a sawi. “Thil an tihbuai vek hnuah contractor an puh leh then a, contractor ruattu chu sawrkar a ni tih ka hriat a ngai,” a ti.
Village council inthlan neih turah sawrkar lai party-in thil tam tak an rawn tiam leh dawn tih sawiin, “A tiam chak lamah MNF ang chauh an ni tawh. An tiam a, a thutiam an hlen ngai lo. VC inthlan turah hian ZPM thutiam chu lo ring suh u, MNF thutiam ang tho a ni,” Zodintluanga hian a ti a. Congress party chu an tiam ang pe mai thin, an tih theih loh tiam ve ngai lo party an ni tih a sawi.
Tunah pawh sawrkar chuan sawhthing an lei tur thu an sawi avangin mipuiin chik takin an thlir dawn a, contractor-te thiam lohah an puh thiang tawh dawn lo tih Congress hruaitu hian a sawi. An insawi anga an awm theih loh avangin mipuiin ZPM sawrkar an ring lo tual tual a, sawrkar laipui lamah sakhaw zalenna thuchah kengtu Congress boruak a tha chho zel a, central politics zul zela kal hian state hmasawnna thui tak a hril, tiin, Mizo mipui pawh kan inherrem a tul tih a sawi a ni.
ZPM chu nuamtawl sawrkar hrilhfiahna tha ber an ni tih Zodintluanga hian sawiin, “An sawrkar nuamsa taka an kal theihnan sum an puk hmiah hmiah a, buhfai man an ti to a, petrol leh diesel-ah chhiah sang em em an la a, chuti chung chuan hmasawnna project liantham engmah kum khat chhungin state tan an la thawk lo. Sawrkar an chak em em a, tha ber tur anga insawiin mipuiin an han enchhin ta cheng a, sawrkar chiah an duhtawk a ni ber, a bak engmah tih an tum lo, an thiam bawk lo a nih hi,” a ti.