Sawrkar intiamna rate aia hniamin
ZOHANDCO-in hmunphiah lei tum
ZPM sawrkarin hmunphiah kg ah Rs.100 a lei tura a intiam laiin, hemi aia hniam Rs.80-in ZPM party president chairman-na ZOHANDCO chuan hmunphiah lei a tum niin Congress hruaitu Dr Lalmalsawma Nghaka chuan a sawi.
Nilainia Saiphai, Saipum, Phainuam leh Vairengte khuaa hmunphiah chingtute harsatna a hmuna a tlawhnaah MPCC treasurer Dr Lalmalsawma chuan a intiam anga sawrkara din loh avangin kuthnathawkte beidawnna a thleng mek a. Hmuhphiah bikah phei chuan nikum lamah lungngaiin an kun ngawih ngawih tawh a, kuminah an manganna chu beidawnna runpuiah a chang chho mek tih a sawi.
Sawrkarin hmunphiah lei tura a intiamna chu dawtah a chan mek avangin, hmunphiaha eizawngte chawbel ben buak sakin a awm a. Kumtluana an tha sen pawh engmah loa a chan thu leh, Congress sawrkar laia hmunphiah hmun siama bul tan an nih tlangpui thu sawiin, kum khata cheng nuai hnih chuang hmu thinte khan, ZPM sawrkar hnuaiah cheng sing 4-5 pawh an la lut pha tawh lo nawk niin a sawi.
“ZPM president chairman-na ZOHANDCO chu hmunphiah ro quintal 7240 vel society kaltlanga lei turin sawrkarin a ti tih kan lo hria a. ZPM intiamna kg-a Rs.100 tih chu ZOHANDCO hian a aia hniam daih, Rs.80 in lei a tum a, ZOHANDCO hian a leina tur sum hi a la nei lo niin kan hre bawk,” Dr Lalmalsawma hian a ti a. Sawrkar chu sum puk chawp leh a ba thlaua ram a hruai mek ang hian, hmunphiah leh sawhthing leina tur pawh a ba-in a kalpui dawn nia a lan thu a sawi. “Kan sawrkar hrawn mek hian an intiam anga an awm loh zia mipuiin an hmu zel a, sawrkarah beisei tur an hmu tlem tual tual a ni,” a ti.
MNF sawrkar nen thutiama din loh kawngah ZPM sawrkar chu danglamna an nei lo tih MPCC treasurer hian sawiin, ZPM sawrkar chu kuthnathawk, miharsa leh rahbi nghet lote harsatna a hmuna en ngai lo leh an dinhmun dik tak hmuthiam pha lo, mi nawlpui harsatna hrethiam pha lo an nih tih a chian thu a sawi a. Mizorama sawrkar awm tawh leh awm mek zingah mahni thuthiama dingnghet a, mahni flagship hlawhtlinpui awmchhun chu Congress sawrkar a ni tih mipuiin an hrechiang tulh tulh tih a sawi. “Miharsa zawkte, kuthnathawkte, sawrkar hnathawkte leh mi nawlpui tana thian tha ber chu Congress party a ni tih a langchiang chho ta hle,” a ti.
Sawrkar intiamna rate aia hniamin ZOHANDCO-in hmunphiah lei tum
