Tunhnaia Free Movement Regime tihtawp leh ramri hung tuma na lehzuala sawrkar laipui a chet danah Mizorama sawrkar mek chu a zuam hle ah an ngai tih MNF chuan an sawi.
MNF Gen. Hqrs. thuchhuak chuan, tunhma atanga sawrkar laipui tih tum, sawrkar kalta MNF-in a do tlat chu sawrkar thar kan neih chinah na lehzualin hma a rawn la a. Myanmar nen kan inrinaa zalen taka khawsak theihna Free Movement Regime (FMR) chu Manipur chief minister duhdan angin a titawp a. Ramri pawh hung a tum hle tih hriat a ni tih a sawi. ‘Mizorama sawrkar mek hi central-a BJP sawrkar hian a zuam hle ni ah kan ngai a, a zuamna turin tun inthlanpui khan puanhnuai thil an nei a nih ngei a rinawm hle,’ a ti.
FMR tihtawp leh ramri hung chungchanga chief minister tanna leh thusawi thin chu a rinhlelh awmin a ngaihthat thlak loh an tih thu sawiin, sawrkar laipui hmalakna FMR tihtawp chu MNF chuan na takin a do zel dawn a, hei vanga Myanmar Zofate leh Mizoram lam ramri depa chengte harsatna tawh mek chu a rang thei ang bera sukiang turin Mizoram sawrkar a ngen tih a sawi. Ramri hung tura hmalakna pawh barhluih ramri a ni tih pawm a, sawrkar laipui hnena titawp tura na taka hma la turin a ngen tih a sawi bawk.
‘A hunlaia thil thleng, khawchhak lama kan unau thenkhatte khawsak phung avangin ram mipuiin khawchhak lam atanga lo chhukte ninna nasa tak a awm avangin ramri hung tul tihna a lo awm tawh thin a. Tlawmngai pawl thenkhat pawhin umchhuah kawngah sawrkar nawrin, nasa takin hma a lo la tawh a. Chuvangin MNF chuan Assembly-ah hial bill pulutin, a lo pass tawh a. Bill pass hi a hmalak tawp chin niin, kan unaute nen inpumkhatna a taka kalpui kawnga harsatna siam thei a nih tih hria in, hemi kawngah hian MNF kaihhruai sawrkar chuan hma a la zui ta lo,’ MNF thuchhuah hian a ti a. Sawrkar kalta khan hemi kaihhnawih kan unau rawn raltlante kutzia chhinchhiahna siam (biometric enrollment) ti tura sawrkar laipui nawrna pawh cabinet meeting-in a lo hnawl tawh tih a sawi a ni.
‘Kan unau Myanmar-a awmte pawh kan impumkhatna leh unauna tichhe zawng leh ruihhlo chi hrang hrang Mizoram kaltlang leh Mizorama lalut tawh lo turin MNF chuan a ngen a ni,’ a ti.
Sawrkar lai hi central-in a zuam – MNF
