Sawrkar laipui hotu in Champhai tlawh

Sawrkar laipui hotu in Champhai tlawh
Sawrkar laipui Ministry of Agriculture & Farmers Welfare-a joint secretary (RFS) Franklin L Khobung chuan Mizoram tlawhin Thawhtanni khan Champhai a tlawh a. Kuthnathawktute tana sawrkar hmalakna hrang hrang a hmunah a enfiah.
District Agriculture Office a tlawhnaah DAO Champhai F Lalmalsawma leh a thawhpuiten an lo dawngsawng a. Department hnathawh dan leh kalphung an lo hrilhfiah. Hemi hnu hian Irrigation & Water Resources Office a tlawh bawk.
Joint secretary hian Agriculture department-in FOCUS kaltlanga hma an lakna, Hmunhmeltha Tlangram zaua Integrated Farming System tlawhin loneitute hnathawh dan leh an hmalakna a enpui a; loneitute hian Integrated Farming System hmanga hma an sawnna leh mamawh an lo thlen a ni.
District Horticulture Office Champhai a tlawhnaah DHO Lalrinchhani’n a lo dawngsawng a. Department hmalakna hrang hrang a hmunah enpuiin, heng zingah hian sapthei sawngbawlna tur Cold Storage Complex New Champhai ami a tel.
Champhai Winery a tlawhnaah Franklin L Khobung hian an hmunhma leh an hmalakna a enpui a. Winery hruaitute kawmin, changtlung zawka grape tui siam chhuah dan tur leh awmze nei zawka hralh dan tur an sawiho a ni. Hemi hnu hian Turmeric Processing Plant Tlangsam ami a tlawh bawk.