Sawrkar lai mek chuan fel chu tum khawp a, mah se an tlin lo a ni tih Congress hruaitu John Rotluangliana chuan a sawi.
Zirtawpnia Congress Bhavan-a inkhawmah MPCC Political Affairs Committee member John Rotluangliana hian, ZPM sawrkarin austerity measure an ti a, Year of Consolidation te an ti a; a Sap tawng an hmang diklo nge, a letling zawng hlirin an kal tih a sawi. VIP culture an tih pawh a kentel an hre lo nia sawiin, “VIP-te thu a ni lo. Security guard-te hi duh loh vanga pek loh ngawt theih a ni lo. Motor pakhat kawl pawh an ti thei bik lo a. Thil reng reng hi a pawn atang chuan sawi a awl a, mah se a chhungah a har,” a ti.
ZPM sawrkar chuan fel chu an tum khawp a, mahse an tlin lo, tiin, “Thil enchhin hian a daih rei ngai lo. An thiltih reng rengah sawrkar kal tawh mawhpuh zel hi em ni kalphung thar chu? Thlai thar lei nan vaibelchhe 110 kan dah an ti a, hman leh chuan si loh chuan enge dah kha sawt ang? Kan sawrkar kal mek hi sawrkar ka hriat tawhah chuan an nawi ber a; chief minister adviser atanga joint secretary thlengin an inruat a, fouth grade thlengin an la inruat duhin ka ring,” a ti.
Kum khat pawh la tling lo sawrkar nawi tak chu an fin thut a ring loa, an nawi telh telh a ring tih MPCC hruaitu hian a sawi a. Term khat an daih a rin loh avangin anmahni lam an inpeih hman loang tih a hlau zawk tih sawiin, tangruala hna thawh a ngai tih a sawi.
Sawrkar mek hian fel chu tum viau mah se an tlin lo – John Rotluangliana
