ZPM sawrkarin SASCI sum a tih lapse-ah Aizawl South I bial huamchhunga hnathawhna tur a tam chu pawi a tih pui hle tih MNF MLA Dr R Lalthangliana chuan a sawi.
Aizawl South I huamchhung ami AMC Ward XVI & XVII a MNF candidate-te inhmelhriattirna hun Thawhtannia an neih a hmanpuinaah MNF senior vice president Dr R Lalthangliana chuan, tunhnaiah MLA Pu Robert Romawia Royte chuan ZPM sawrkar tirh kum 2023- 2024 khan SASCI part-1 sum sanction fel sa thlap cheng nuai 11152 leh sum allocate sa nuai 32800, a vaiin nuai 43952 an ti lapse tih a hai chhuah thu sawiin, “Khati zat sum kan chan/ hloh kha a uiawmin a pawi hle a, kan ram hmasawnna tura kawngro su tham a lapse hi sawi pial mai mai chi a ni lo,” a ti.
Sum an tih lapse zingah AMC Ward XVI huamchhunga Bethlehem Vengthlang Hall sakna tur cheng vbch. 9.50, Bethlehem Vengthlang High School sakthatna tur cheng vbch. 2 leh College Veng Hall extension tihna tur vbch. 3.5 a tel nia a hriat thu sawiin, chief minister-in sum a enkawl thiam loh zia, 2nd instalment tuartute zingah Aizawl South I an tel chu thil pawi tak a ni tih a sawi.
Kan puk ve loang, tituten an puk nasa ber nia sawiin, 2023 December-a ZPM a sawrkar tirh atanga kumin February chhunga an sum puk zat chu cheng vaibelchhe 6445.45 a ni tawh a, SASCI loan ringawtah cheng vbch. 2482.57 an puk tawh niin a sawi.
Kum 2026- 2027 budget pumpui cheng vbch. 17,076.92 a nih laiin; state leiba chu vbch. 19,085.15 a ni a, budget aia leiba a tam zawkna chu vbch. 2008.23 a tling tawh tih a sawi bawk.
“Hengte avang chauh pawh hian chief minister Pu Lalduhoma hian financial management a thiam loh zia a langchiang a. Finance department hi a enkawl zo lo a nih chuan a enkawl theitu tur hnenah mawhphurhna hlan mai se a tha ang,” Dr R Lalthangliana hian a ti.
Hengte leh chhan hrang avangin Aizawl khawpui enkawltu atan ZPM an tlak loh a, hnawl ngam a tul tih a sawi a ni.
Sawrkar sum tih lapse-ah Aizawl South-I a hnathawhna tur a tam – Dr R Lalthangliana
