Sawrkar tana dan lama
mawhphurtute intuaithar
Dan kaihhnawiha sawrkar hmatheh ber, sawrkar ukil leh department tina a kaihhnawih officer-te tana an hriat tur inhrilhin Ningani khan Aizawlah intuaitharna hun an hmang.
He hun hmanpuitu chief minister legal adviser C Lalramzauva chuan sawrkar ukil-te leh department tina nodal officer inkarah thawhhona tha a pawimawh, tiin, court case tam takah Mizoram sawrkar a tel ve thin avangin an hna tha tak leh dik taka thawk turin a chah. Court-in dik tak leh chak zawka thutlukna a siam theihna’n tha taka court puitu ni turin sawrkar ukil-te a ngen a, mimal dikna chanvo zahsak a tul rualin, dan erawh dik taka kenkawh a nih theihna’na thawk turin a chah a ni.
Mizoramah The Limitation Act 1963 hman a nih tawh avangin sawrkar ukil-te chu an hnathawhnaah hmanhmawh thiam a, huntiam chhunga law suit file leh appeal huna appeal thei turin a fuih bawk.
Chief secretary Renu Sharma chuan state dangte ngaihtuahin Mizoramah court case a tlem chu thil lawmawm tak a ni tih a sawi a. Law & Judicial department-in ‘Mizoram State Litigation Policy 2023’ notification a tichhuak ta chu fakawm a tih thu a sawi. Sawrkar ukil leh department nodal officer-te chu technology chhuakthar hmang tangkai turin a chah a ni.
Intuaitharnaah hian sawmbikten thupui thlan sa hmangin sawrkar tana dan leh a kaihhnawiha hma an lakna tura an hriat tur pawimawh an zirtir a ni.
Sawrkar tana dan lama mawhphurtute intuaithar
