Sawrkar kalsual leh tih dik loh vanga sawrkar tum loin, anmahni hmachhawp neih hmanga mipui hneh a, chumi hmanga sawrkar an tum tur a ni tih Congress senior vice president Lalnunmawia Chuaungo chuan a sawi.
Zirtawpnia Congress Bhavan-ah political session-ah Lalnunmawia Chuaungo chuan, politic-a an luh chhan a inang vek loa dinhmun siam nan, inhaivur nan, ram rawngbawlnan te a ni thei, tih sawiin, “Politic- a thlantlinte hi anmahni leh an chhungte inhaivur a, hamthatna an dawnna tur a ni loa, ram leh hnam hmasawnna tur, mipuiin hamthatna an dawnna tura thlantlin an ni thin. Keini pawhin chutiang rilru chu pu in, ram rawngbawlna kan ngaipawimawh ber a ni tur a ni,” a ti.
MLA inthlanah ‘Congress ni lo, MNF ni lo’ tih slogan a lar a, Congress sawrkarin thil tha tih tamtak a nei a, thawk tha pawh a inti a; MNF pawhin thawk tha a inti em em a, chutih laiin kan rawngbawl sakten eng angin nge min ngaih tih a pawimawh ber tih a sawi.
“Sawrkar kal tawhte kan duhkhawp lohna emaw kan lungawi lohna tawngka kan hre tam hle a. ZPM pawhin chu chu an sawi nasa a. An auhla pui Congress ni lo, MNF ni lo tih chu an sawrkar pui ta a. ZPM sawrkar kalsual leh tih dik loh avanga sawrkar kan tum tur a ni loa, keimahni’n hmachhawp kan neih hmanga mipui kan hneh a, chumi hmanga sawrkar kan tum tur a ni,” MPCC hruaitu hian a ti.
‘Political will’ a awm a, thil tha duhna a awm chuan mi tamtakin duh loin, dodal thin mah se, a hlawhtling thin a, hamthatna dawngtu pawh mipui an ni a, mipuiin an chhawr thin, tiin, ram rorelna chu tihtak tak na nen bei turin an party mite a sawm tih a sawi bawk.
Sawrkar tih dik loh vanga sawrkar kan tum tur a ni lo – Lalnunmawia Chuaungo
