CSS hnuaia thawkten sawrkar laka thil phut neia hma an lak laiin sawrkar chuan pisa an kai leh kai loh dan chhinchhiah a tum.
Mizoram sawrkar General Administration Department-in Thawhlehnia administrative department ho hnena hriattirna a tihchhuahah 2025 September 16 khan Mizoram sawrkara CSS hnuaia thawkten sit-in demonstration an huaihawt thu tarlangin, sawrkar ruahmanna siam kalh zawnga hmalaknaah CSS hnuaia thawkte chu tel lo tura tih an nih thu a sawi.
Hei vang hian administrative department ho chu an hnuaia CSS employee-te 2025 September 16-a an attendance record chu, a tul anga hmalak a nih theihnan tlai dar 4.00 hma ngeia GAD deputy secretary hnena thehlut tura hriattir an ni.
GAD hian September 15 khan hriattirna tichhuak tawhin, dan anga CCS hnuaia thawkte chu danin a phal ang chu a remchan anga dah ngheh zel tum an ni a, dan ang ni loa lak erawh a ngheta lak vek kher a rem lo tih sawiin, Mizoram sawrkar hnuaia thawkten an zawm tur dan zawm lo an awm a nih chuan department hotuten a tul anga enzuia hma la turin a lo hriattir tawh a ni.
Hetihlai hian September 15-a adviser to chief minister TBC Lalvenchhunga’n CSS hnuaia thawkte chu danin a remtih loh avanga dah ngheh theih loh nia a sawi chungchangah CSS employee-te intelkhawmna pawl chuan, sawrkarin dan a ngaipawimawh a nih chuan CSS-a an thawhpui SSA zirtirtu chungchanga court thutlukna chu tihlawhtling se an duh tih an sawi.
Samagra hnuaia primary leh middle school zirtirtu dahngehna, Gauhati High Court-in kum 2023-a thutlukna a siam a, thla 6 chhunga tihlawhtling tura a tih la tih hlawhtlin loh chu ti hlawhtlin se an duh tih an sawi a. Sawrkarin a tihhlawhtlin loh avanga court thutlukna pawisa lo, tia 2023 September 23-a court-a an thehluh leh pawh tun thlengin hmasawnna a la awm lo tih sawiin, sawrkar dan leh hrai ngaihpawimawh a nih chuan hengte hi tihhlawhtlin an duh tih an sawi a ni.
Sawrkarin CSS thawkte pisa kai leh kai loh enzui
