Mizoram sawrkar chuan National Health Mission (NHM) hnuaiah doctor 32 a la thar a. Hetihlai hian tunhnaia NHM hnuaiah vek document lem hmanga dental surgeon lak chuan a hna atangin banna a thehlut.
Medical doctor indaihlohna phuhrukna tura chief minister leh Health minister Lalrinpuii hmalakna kal zelah Ningani khan Mizoram sawrkar chuan state chhung hmun hrang hrang doctor post ruak hnawhkhahna leh indaihlohna phuhruk nan doctor 32 chu NHM hnuaiah a la thar a. Heti hian tun dinhmunah Mizorama doctor indaihlohna chu a phuhruk then thei dawn nia ngaih a ni.
Doctor lak tharte hi kumina Zoram Medical College atanga graduate-te niin, 2024 June 14 ralhma in NHM mission director hneah joining report pe tura hriattir an ni. June 18-28 chhung hian Aizawlah orientration training an nei zui dawn a ni.
Hmun hrang hranga doctor leh damdawi lam hnathawk indaihlona sutkian mek zel a ni chu lawmawm an tih thu Health department chuan sawiin, tun tuma Mizoram thingtlang khuaten an mamawh leh an chhawr tangkai em em thin – PHC, UPHC, CHC leh UHWC a doctor post ruak 32 hnawhkhah a ni chu lawmawm an tih thu an sawi.
Hetihlai hian Mizo Zirlai Pawl-in Mizoram sawrkar hnuaia dental surgeon (ha doctor) hnathawk zingah document lem hmanga hna hmu awma a hriat avanga hma la tura Health minister Lalrinpuii an ngenna kal zelah, he dental surgeon lem hian June 5 khan sawrkarah banna a thehlut a, June 6 khan pawmsak nghal a ni tih sawi a ni.
MZP Gen. Hqrs. thuchhuak chuan, National Health Mission (NHM) hnuaia dental surgeon (ha doctor) hna thawk mek zingah document lem hmanga hna hmu an awm ngeiin an hria a. RTI Act hmanga an chhuizui hnuah, NHM hnuaia thawk tur 2023 February-a lak zingah a tel a. Doctor a zir chhuahna nia tarlan institution-ah hian a lut lo hrim hrim tih finfiah a ni tih a sawi.
Health minister chu kumin June 21 ralhmaa MZP thu hriat a dik leh dik loh chhuichiang tur leh a tul anga hma la turin an ngen a. Lehkha bakah hmaichhanah minister hi an sawipui.
MZP ngenna chu Health minister hian bawhzuiin, dental surgeon lem hian 2024 June 5 khan amah chhawrtu NHM-ah banna lehkha a thehlut a. NHM hian June 6 khan banna lehkha hi a pawm nghal tih a sawi a ni.
‘Health department bakah department dang dangah pawh hetiang thil, document lem leh dik lo taka hna hmu an awm leh awm loh kan enzui zel dawn a ni,’ MZP chuan a ti.
Sawrkarin doctor 32 la thar Dental surgeon lem a bang
