Daily Newspaper

Sawrkarin inkharkhip puan tum rih lo

12

Covid-19 leng mekah Mizoram sawrkar chuan inkharkhip zawnga hma lak a rel dawn rih lo tih a sawi.

Mizorama Covid-19 hrileng mek chungchang thlir hoin Zirtawpni khan Health minister Dr R.Lalthangliana hoin a kaihhnawih sawrkar hotute an thukhawm a. Home minister Lalchamliana, Medical Operational Team chairman Dr ZR Thiamsanga leh chief secretary bakah Health department, Home department leh I&PR department official-te an tel a. Mizoram Kohhran Hruaitute Committee, Jt. NGO Coordination Committee leh Indian Medical Association aiawhte an tel bawk.

Thutkhawmah hian thla hmasaa Aizawl khawpui inkharkhip hnua Covid-19 hri kai an tlem dan sawi ho a ni a, tun dinhmun enin inkharkhip puan hian awmzia a nei hle in an hria a. Ministry of Health & Family Welfare-in kumin November 2-a Mizorama hri kai zat tur an chhutlawk danah 2020 December 4-a mi 4363 ni tawh tura an chhut chu tunah hian mi 3888 in hri an kai tih sawi a ni. Tunhnaia lockdown puan leh tura thuthang awm chungchangah boruak a inthlakthleng thut a, harsatna thar a awm emaw kan dinhmun a derthawng ta viau emaw a nih loh chuan inkharkhip tumna a awm loh thu sawi a ni.

Covid-19 darh zel tur ven nan Aizawl khawpui hmun hrang hrangah awlsam zawka sample endik theihna tur mobile testing centre – ‘kiosk’ siam chungchangah a hmunhma ngaihtuahtu Medical Operational Team report ngaihthlak a ni a. Tunah hian Bawngkawn South Cultural Centre leh Chawlhhmuna Junior Cooperative Society Training Centre chu hman theih tura peihfel a nih tawh thu leh, sawrkarin notification a chhuah veleh hman tan theih turin engkim tihfel tawh a ni tih an sawi. Aizawl chhim lamah hmun laili pakhat an hual deuh chu remchan lohna a awm avangin hmun remchang dap mek a nih thu an sawi a. Kiosks-a sample endikna man – RT-PCR, TrueNAT leh RAgT hi India ram khawpui hrang hranga an endikna rate nen khaikhina mipuite tana phurrit lutuk ni lo tura ruahman a ni tih an sawi.

Medical Operational Team, Indian Medical Association leh Mizoram Government Doctors’ Association tanghoin Aizawl Dawrpui Veng huamchhung an zirchiannaah, mipui mimir veivak leh dawrkaiten mask an vuah tha a, dawrkaiten sulhnu mobile application QR code an tar bakah dawrtute chhinchhiahna tur register an dah bawk a, hetih rual hian dawr kawta thu/inpho te erawh chuan hetiang hi an ti lo tlangpui tih an sawi.

Bazarpui building – sa zawrhna leh thlai, eichawp zawrhnaah sulhnu app leh register dah hian zawm a hlawh tha lo deuh tih an sawi a, a tul angin a hmun enkawltu department lamah thlen a tul nia hriat a ni. Hetihrual hian QR code hi mipui lamin a hman dan kan thiam tawk lo niin an hriat thu an sawi a ni.

Covid-19 hri kai, mahni in lama inenkawl (home isolation) te neih ngei ngei tur home care kit – digital thermometer, pulse oximeter, N95 mask, gloves mamawh zat ang tawk, PPE full kit 3 tal, hand sanitizer-te chu home isolation-a awmten ngaipawimawh thin se an duh thu sawi a ni. Covid-19 helpline hmang tangkai turin mipuite an chah a ni.

Lai Autonomous District Council inthlan neih mekah vote thlak nimahse, election process hi December 14 thleng a ni avangin sawrkarin theihtawp chhuahin a fimkhur tih an sawi a bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy