Mizo kût zinga mitthite puala hman thin Mim Kût chu Thawhtanni khan hman a ni a. Aizawlah chuan Social Welfare & Tribal Affairs minister Lalrinpuii hoa hman a ni.
Minister chuan Mim Kût chu nikum lam atanga hman tan leh chauh a nih rualin hmangaih kaltate puala thil tih khawm leh hun serh erawh Mizote zingah leh hnam hrang hrang zingah pawh tih dan fo a ni tih a sawi a. Hemi changchawi leh Social Welfare & Tribal Affairs hmalakna pakhat, TRI (Tribal Research Institute) scheme hnuaia Mizo kût tuaithar lehna behchhanin sawrkar department lam, mithiam leh tlawmngai pawlte bakah chanchinbumite leh Mizoram Kohhran Hruaitu Committee nen Mim Kût hi duanho a ni tih a sawi.
Mizo kût chu khawvel hriata pho chhuah hmain a kût neitu Mizo mipui rilru chawhthawh phawt tul nia an hriat avangin kût hman dan thu ah pawh thuken bik neiin, mitthi pual thlaichhiah aiah miharsa zawkte tana luanchhuahna hun hmang tura insawmna leh hmangaih kaltate zalhna thlanmual tihfaina hun hman chu tha hlea a hriat thu a sawi a. Mitthite chuan minung chaw chu mamawh lo mah se, an kalsan takte ngaihven leh ngaihsak chu an tana kan tih theih ropui tak a ni tih a sawi a ni.
SW&TA director Dr Lalhriatzuali Ralte chuan Mizo pipute hman thin kût chu tunlai mil leh tih chhan tha zawk nena hman leh vawnnun bakah chhuan thar zawkten an chhawmnun zel theih nana zirtir leh kaihhruai chu Mim Kût hman chhan bulpui ber a ni tih a sawi
Mim Kût puala buatsaih essay inziahsiak lawmman sem a ni a. Zaithiam sawm bikten Pathian fakna hla leh Mizo zai hla hmangin an awi a ni.
Mim Kût hi hmanlai Mizo pipute chuan an chhungte thi tawh puala hun an hman thin a ni a. Mitthi chhungte hian mitthite ei ve tur nia ngaiin eitur an dahsak thin a; hei hi ‘Thlaichhiah’ tih a ni. Mim Kût hi Mizo thawnthu pakhat ‘Tlingi leh Ngama’ thawnthu behchhana intan nia hriat a ni a, he kût leh a hman dan thuah hian kumin September 23 khan mithiamte nena sawiho a ni.
Social Welfare, Tribal Affairs department hmalakna in ‘State Steering Committee for Celebration of Mim Kut’ din a ni a. General Administration Department-in Mim Kut pual hian sawrkar pisa leh zirna ina thawktuten a remchan anga Mizo hnam thuam inbel tura a chah angin district dangah chuan a hrana programme siam ni lo mah se, hnam thuam inbelin pisa an kai hlawm a ni.
Sawrkarin Mim Kût a hmang
