Daily Newspaper

Sawrkarin mitthi vui dan ennawn rel dawn

13

Covid leng mekah khawtuala inkaidarh thulha mitthi vuina inkhawma telte inchhuizui a harsat dawn avangin YMA leh kohhran hruaitute nen inrawna ennawn nise tiin sawrkarin a rawt.

Tunhnaia Covid-19 kai pun chhoh danah Health & Family Welfare minister Dr R. Lalthangliana hoin Pathianni khan sawrkar official-ten thutkhawm hmanhmawh an nei a. Mitthi vuina programme-a mipui kalkhawm zingah contact tracing tih ngai awm ta se, harsatna a awm theih dawn avangin, chhiatni thatni inkaihhruaina chungchangah YMA hruaitute leh kohhran hruaitute nen inrawntlan that leh nise tih a ni. Gymnasium leh sports complex-te khar leh tura hma lak nise an ti.

Mizoram University hnuaia under graduate leh post graduate exam turte chu exam nei rih lo (postpone) turin Disaster Management & Rehabilitation Department atanga thurawn (advisory) pek nise an ti a; Rapid Antigen Test kit singkhat lei belh remtih a ni bawk.

Zoram Medical College Falkawn chu Covid-19 kaite enkawlna tur bika ruahman a nih angin, Covid-19 kai nilo chu damlo dang tumah admit tawhloh tura rel a ni a. Khawtuala inkaidarh lo awm palh ta se, hemi atana inbuatsaihna, a bikin a hmatawnga thawkte (frontline workers) tan hmalak dan tur ruahmanna (contingency plan) neih nise tih rel a ni. Swab sample result nghak tan inkaihhruaina (SOP) siam remtih tlan a ni.

Nitin mamawh phurtu truck driver-te bakah rampawn atanga thlawhnaa lo lut (passengers) nitin mi 60-70 leh lirtheia Vairengte paltlang (by road) a lut mi 50 vel an awm reng tih ngaihthlak a ni a. Mizoramah Covid-19 positive an pun tak hluai avangin nitina lo lutte hi awmze neia khuahkhirh tulin an hria a, a tul anga hma lak nise tih a ni. Chief secretary Lalnunmawia Chuaungo chuan Independence Day lawmnaah national anthem, guard of honour lak leh chief minister thuchah a awm dawn tih a sawi a. Hrileng laka him nan kum dang angloin mipui leh zirlai sawm an ni lo tih a sawi a, parade a awm dawnloh thu leh Governor’s at Home programme a awm dawnloh thu a sawi.

THE AIZAWL POST
~Tualchhung~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy