Mizoram sorkarin sawhthing lei hna a thawh chu zawh fel a ni tawh a, quintal nuai 1.45 vel sawhthing hi lei a ni.
A lei hna thawktu Mizoram Agriculture Marketing (MAMB) hotute chuan kuminah May ni 30 thleng khan sawhthing hi lei a nih thu an sawi a, official-in an khar tawh tih an sawi bawk.
Sawhthing lei tur awm ang ang lei kim a ni hman em tih thu-ah an lei fai em tih sawi chian a har thu an sawi a, May thla thlengin sawhthing hi hralh theih a nih tur thu an inhrilh lawk sa a, sorkar tan a lei hun chhung bituk a ngaih thu leh ruahman lawk angin May ni 30-a khar a nih thu te an sawi.
An chhinchhiahna, May ni 31-a mi-ah chuan sawhthing hi kg 145,66,489.18 an lei a, chu chu quintal 1,45,664.8918 a ni. Sawhthing man zawng zawng hi belhkhawmin Rs 3721,10,005.14 a ni.
Sawhthing lei hna hi February ni 9-ah an tan a, February-a lei tan tura tih niin, thil tihfel ngai neuh neuh a awm avangin ni 9-ah an tan a ni.
A neitute’n an hralhna hi a inang lo thluah a, a leitute pawh mi hrang hrang an ni. Kg 1 man Rs 50 a tlin lohna kha sorkarin a tum a, chuvangin sawhthing neitute hian kg 1 Rs 50 zelin an hralh vek tihna a ni.
Aizawl – 18,05,343
Lunglei – 3,36,250
Siaha – 4,80,312
Champhai – 35,47,077
Kolasib – 2,11,604.50
Serchhip – 18,54,819
Lawngtlai – 5,62,236.20
Mamit – 7,25,120.90
Saitual – 20,57,359.58
Khawzawl – 20,23,163
Hnahthial – 9,63,204
Sawrkarin sawhthing lei hun titawp
