Saza kaptua puh an man
Aizawl Forest Division hnuaia Saitual Forest Range range officer leh a hote chuan April 1 khan Mualpheng khuaah saza kap a, a sa rep kawltua puh mi pakhat an man.
Saitual Forest Range thawktute hian an report dawn bawhzuiin pawikhawihtua puh chenna in hi an dap a, saza sa ni ngeia rin hrang 39 leh a thin kg chanve an man sak. He pawikhawihtua puh hi hemi ni vek hian District Court Aizawlah thubuai siamsak niin, judicial custody-a dah nghal a ni.
Saza hi Wildlife Protection Act 1972 hnuaia Schedule-I ramsa zing ami a ni a. Schedule-I ramsa hi tihlum emaw a sa hrim hrim – a rep leh rep lo pawh kawl emaw satlaw chhar emaw pawh nise. hremna chu kum thum aia tlemlo atanga kum 7 thleng jail tan theihna leh sumfai Rs. 25000 thleng chawi theihna a ni.
Mizorama ramsate tina loa, kan tuchhuan lo awm lehzel turte tana humhalh leh venhim kawnga hma sawn zel turin EF&CC department chuan mipui a ngen tih a sawi nawn a ni.
Saza kaptua puh an man
